Nga phet noh na ka BJP namar ngam lah shah ïa ki jingshah thombor ki Khristan : Leslee

Shillong, Kyllalyngkot 9 : U MLA ba rim u John Leslee K Sangma u la ong ba ka jingphet noh jongu na ka BJP ka dei namar ba um lah ban shah ïa ka jingshah thombor ki paid Khristan ha kylleng ka ri India.
“ Nga la rai ban phet noh na ka BJP namar haba ki para paid Khristan ki shah thombor ha kiwei ki bynta ka ri, kumta ngam sngew dei shuh ban dang don ha kum kata ka party kaba thombor bad leh beiñ ïa ki Khristan namar ka mynsiem ïatip lem jong nga kum u Khristan ka ktah ïa nga. Kane ka dei kaba nga don ban ïathuh ïa ki paid Khristan kaei ka nongrim ba nga phet noh na ka BJP” ong u John Leslee.
Halor ka hukum jongka sorkar Assam ban wad jingtip bniah shaphang ka jingdon ki Khristan, ki ïing Mane, ki nongïalap ba pynkylla niam, u la ong ba ka sorkar Assam kam dei satia ban leh kumne namar kane ka long pyrshah ïa ka Riti Synshar ka ri kaba ailad ïa baroh ban Mane Blei laitluid ( Secular), kumta ym tang ba u pynrem halor kane hynrei u dawa ruh ba dei ban weng mardor ïa kane ka hukum.
U John u la pynpaw ba u sngewdiaw bha halor ka rukom pynrem jong u Myntri Rangbah halor kane da kaba u ong ka long ka bym sngew tynnad, kane kam dei ka rukom, ka long kaba bakla bad ki paid Khristan ki dei ban pynrem jur. Ym tang katta wat ki riew shimet, ki paid Muslim bad kiwei kwiei ki dei ban pynrem jur namar ka Riti Synshar ka ri ka kdew shai ba baroh ki nongshong shnong ki don ha kok ban mane laitluid bad haba u myntri rangbah u ong ba ka long kaba ym sngewtynnad u sngew ba ym biang ka jingkren. U la ong lada u Myntri Rangbah ka Assam u pynpaw ba ka sorkar kam tip ei ei halor kane, un ym ngeit satia namar un ngeit tad haduh ba u Himanta Biswa Sarma un pynshitom ïa kito kiba leh ïa kane ka kam pyrshah ïa ki paid Khristan.
Halor ka jingsatah ki dur jong u Myntri Rangbah ha ka nongbah Tura, u John Leslee u la kynnoh ba kane ka pynpaw ba u Myntri Rangbah u don ka jingsyier ha ka election 2023 na kata ka daw u la phah wah ïa ki dur kylleng ka nongbah Tura.
U John Leslee u ban ïakhun pyrshah ïa u Conrad K Sangma na ka UDP u la ong ba wat u Bernard N Marak u ban ïakhun na ka BJP ruh um dei u kyrtong uba biang na ka bynta ka South Tura namar une u dei uba la leh bun ki kam runar bad kam be-aiñ.
Haba ïakren bad ki nongthoh khubor ula ong ba ka jingsyier bad jingkhyiuh ka la synshar ha u Conrad K Sangma na kata ka daw ba u hap ban phah wah ïa ki dur man la ka 10 meter. “ Lada phin leit sha Tura phin ïohi sa tang ki dur jong u Myntri Rangbah uba la buh dur ryngkat ki jingthoh bad jingkular ba har rukom. Kine ki dur ki dar ym dei ba la buh da ki nongkyr-shan jongu hynrei da ki nongbylla kiba leit ban wah ïa kine ki dur namar wat ha ka dukan ne ki ïing jong nga ruh ki don ki dur jong u Conrad” ong u John.
U la kynnoh ruh ba u Myntri Rangbah um ju don por ban ïa pyllut bad ki paidbah namar man ba u wan sha Tura u wan kum ka lyer. Kumta ula ong ba ka jingpyrshah jong ki paidbah ka jur bha mynta ka kynti ïa u Conrad bad na kata ka daw u sngewthikna ban jop biang mynta ka kynti.
Nalor kata u la ong ruh ba u Bernard u la leh ia shibun ki kam beaiñ kiba la pynlong ïa ki paidbah ban tip bad ïohi lut bad kane kan ktah ïa u bad wat ïa ka BJP ruh namar ka BJP ka pynïakhun ïa u uba la shah ñiew beaiñ bad leh ïa kiba bun ki kam runar.