Shillong, K’lyngkot 09: U Bah Mayborn Lyngdoh, u nongïalam jong ki nonghikai skul Adhoc, uba la pynkhih ñiak ïa ka sorkar MDA ha une snem baladep, mynta u la ryngkoh noh sha ka jylli saiñhima, ha kaba un ïakhun na Pynthorumkhrah Consti tuency na ka Seng VPP.
Uwei na ki nongkren paidbah ba tbit bad uba don ryngkat ruh bad ki jingtip kiba biang haba u kren, mynta ka sngi u la leit ban ai jingkren ha ka jingïalang ka VPP ha Smit. U Bah Mayborn uba shong ba sah ha Nongmensong, un ïakhun pyrshah ïa u MLA ba la jop san sien lynter, u Bah AL Hek, nangta u MLA barim bad MDC ba mynta, u Bah PN Syiem, u Bah Rocky Hek jong ka NPP, u Bah Sambor Diengdoh jong ka TMC.
Haba kren ha ka jingïalang, une u Samla uba ju pynïaid ruh ïa ka jingïatai halor ka saiñpyrthei ha Doordarshan Shillong, u la ong ba ki paidbah ki kmen bad sngewbha ban ïoh ei ïa ki Blanket ha ka por elekshon. Nangta ki ïabeh ruh ban ïoh ïa ka san hajar ka shiphew hajar ha ka por elekshon, hynrei bun pat kim tip ba kane ka jingïoh blanket bad pisa shisien ha ka san snem ka pynkiew dor pat ïa ki marbam mardih man la ka sngi.
“Phi kmen ba ïoh blanket, ba ïoh pisa por elekshon, kata shisien san snem, hynrei phim tip pat ba kane ka pynkiew dor ïa i marbam jong phi man la ka sngi”, u la ong.
Shuh shuh u la ong ba ki paidbah ki kmen tohhoh ba ïoh pisa por elekshon, hynrei kim sngewthuh pat ba ka bai bylla jong ki ka neh kumjuh da ki bun bun bnai ne bun snem ruh.
