Shillong, K’Lyngkot 09 : U President ka UDP, Bah Metbah ba die ruh u kyrtong ban aireng na Mairang constituency ha kane ka elekshon ban wan, u la pynpaw ïa ka jinglyngoh ban ïohi ïa ka rai jong ka National People’s Party (NPP) ban ym pynieng kyrtong pyrshah ïa u na Mairang.
“Ngam tip balei hynrei nga lyngoh ban ïohi ba ki (NPP) ki la pynbna paidbah ba kin ym pynieng kyrtong na katei ka jaka. Ngam tip shuh ïa ka daw balei, hynrei ïa ka jubab hi phin ïoh na ki hi,” u la ong haba jubab halor ka jingkylli la ka don ka jingïatrei lang hapdeng ka UDP bad NPP na Mairang.
Da kaba kam pat ba ka UDP ka ïakhun hi marwei ïa kane ka elekshon MLA ha u 2023, u Bah Metbah u la ong ruh ba u don ka jingkyrmen ba ka party kan tam beit mar shiteng ki nongjop bad ïoh ruh ban ïalam ïa ka sorkar ha kane ka samoi ban wan.
“Ka UDP kan ym treikam satia bad kino kino ki seng saiñpyrthei haduh mynta kaba mut ngin ïakhun marwei bad ngin sa ïoh palat 30 ngut ki MLA,” u la ong haba kren bad ki lad pathai khubor.
Halor ka jingkylli, la ka party kan treilang bad ka All India Trinamool Congress (AITC) hadien ka elekshon, u Bah Metbah u la ong, “Ka jingjied kan sa poi tad ynda la poi ka por.”
U ong ruh balada ki paidbah kim hun ai ka jingtreikam jong ka sorkar MDA ba ïalam da ka NPP ki la dei ban ailad noh kham bun ki MLA sha ka UDP. “Ai kham bun ki MLA ïangi ba ngin lah ban shakri khambha.”
Ha kane ka sngi, u Bah Metbah u la ong ruh ba ka UDP kan peit halor ka jingshah thombor ki khristan lada ki paidbah ki jied ïa ka ban wan ha ka bor ha u 2023. “Lada ngi ïoh ïa ka bor ha u 2023, ngin pyntikna ba ngin peit ïa kine ki jingeh baroh,” u la ong.
