Nongstoiñ, Lber, 22: Na ka bynta ban kyntiew ïa ka ïoh ka kot jong ki paitbah nongrep ha West Khasi Hills, ka ophis jong ka Krishi Viggyan Kendra (KVK) West Khasi Hills ha ka sngi hatmajai ka 21 tarik Lber, ka la pynlong ïa ka programe ba kyrpang ha ka shnong Mawduh kaba don ha ki thaiñ Sangriang West Khasi Hills.
Ïa katei ka prokram ba kyrpang la pynlong ha phyllaw ïing jong u bah Spingshon Marshara sordar barim jong ka shnong Mawduh, u ba dei ruh u nongrep soh strawberry ba nyngkong tam na West Khasi Hills bad ha ka jylla hi baroh kawei, u ba la ïoh ïa ka jingithuh kyrpang da ka sorkar pdeng ïa ka kam rep bad ka jingtrei shitom jong u ha kiba bun ki liang na ka bynta ban kyntiew ïa ki nongrep hapoh ka District.
Ha katei ka prokram la ïoh ïa ka jingpynshai na ka kong Y.Sohtun kaba dei ka ophisar jong ka ophis KVK kaba don ha Nongshilong. Ka kong Sohtun ka la pynshai ha ki nongrep halor ki saw tylli ki skhim kiba kyrpang kiba ka sorkar pdeng ka la mang kyrpang na ka bynta ki nongrep, ba kynthup naduh ki samla kiba la pule ki bym pat pule bad ruh na ka bynta ki rangbah bad ki longkmie.
Kitei ki lai tylli ki skhim kiba kyrpang kiba ka sorkar pdeng ka la mang kyrpang na ka bynta ban kyntiew ïa ki nongrep, ki long ka ka Swacchata Action Plan (SAP), ka Skill Training for Rural Youth (STRY) kaba dei na ka bynta ban rep ïa ki jhur bad ki soh khlem da pyndonkam da ki sboh dawai fertilizers kaba la tip kum ki Organic produnction of fruit & vegetables bad ka Piggerry rearing & management.
Nangta ka Nutri Sen-sitive Agricultural Resour-ces & Innovation, kaba dei ka rukom rep ban pynmih ïa ki jingthung ne ki mar rep, kiba tei bad pynbha ïa ka koit ka khiah bad ka Homestead Agriculture Management in Rural Area, kaba dei ka rep ka riang tang ha ki kper ki phrah ha ki nongkyndong.
Ka jingpynlong ïa katei ka prokram ba kyrpang ha katei ka sngi, ka la ai jingmyntoi shibun ïa ki nongrep kiba la wan na kylleng ki shnong kiba hap ha ki ar tylli ki Block kata ka Mawthadraishan bad ka Nongstoiñ C&RD Block.
Ha katei ka sngi la ïadon ryngkat ruh da u Dr Wahlang u ba dei peit ïa ka jingkoit jingkhïah jong ki jingri jingdup kum ki sniang, ki syiar, ki masi, ki blang bad baroh ki jait jingri. Ha ka jingdon ryngkat jong u Dr Wahlang ki nongri jingri khamtam kiba ri sniang ki la ïoh jingmyntoi shibun, namar u Doktor u la ïohlad ban ïalam ïa ki nongri sniang sha kawei ka sem sniang, ha kaba u la pynshai ïa ki lad kumno ban ai bam, ban ïada na ka jingkem pang, kumno ban ai ïa ki jingbam ki ban pynheh kloi bad ruh kumno ban ri ïa ki sniang na ka bynta ban pynkha bad kumno ban sumar ïa ki sniang haduh ba kin da kha.
Utei u Doktor u la batai ruh kumno ban shna ïa ki sem khnang ba ki sniang kin lait na ki jingpang bad ki san kloi. Ha katei ka sngi la ïoh ruh ïa ka jingpynshai na u bah Spingshon Marshra kumno ban rep soh strawberry, ban thung tit ban shna sboh da kaba ri da ki wieh. U bah Marshra u la ai jinghikai ruh kumno ban shna wine da ki soh bad ban shna ruh ïa ki cold storage kiba bha tam na ka bynta ban buh ïa ki umsoh kiba la thep ha ki bilor.
