La plie ïa ka 7th District Level Industrial Exhibition bad Aqua Fest ha Mawkyrwat

Mawkyrwat, Lber, 22: U Deputy Commissioner jong ka South West Khasi Hills District u Bah T Lyngwa ha ka sngi Balang u la plie pyrda ïa ka 7th District Level Industrial Exhibition & Aqua Fest kaba la pynlong da ka ophis jong u General Manager District Commerce & Industries Centre ryngkat ka jingïatrei-lang bad ka ophis jong u Superintendent of Fisheries, South West Khasi Hills District ha Parking lot jong ka kong P Syiemlieh kaba don ha iew Mawkyrwat.
Haba kren ha ka jingïalang ha kane ka sngi u Bah T Lyngwa u la ong ba ka jingwan ïashim bynta jong ki nongseng kam lajong ha kane ka sngi ka pyni ïa ka jingtrei shitom bad ka jingshim khia ïa ka kam bad ka jingniewkor ïa ka kam wat lada i long i barit ruh kan wanrah ïa ka nam ka burom bad ka jingjop bad lyngba kane ka prokram la ïohi ïa shibun ki mar ki mata kiba kane ka dong ka thain ka pynmih kum kaba thaiñ kriah bad shang, thaiñ jaiñ ,ki ashar, umsoh ryngkat ki nongri dohkha kaba pyni ba ka don ka lawei ka jingkyrmen lyngba ka jingnoh synniang jong kiba bun ki nongseng kam lajong.
U la ong ba wat lada ngim don ki karkhana kiba heh hynrei lyngba ki mar ki mata kiba ngi lah ban pynmih ngi lah ban kyntiew ïa ka ïoh ka kot ha ka jylla bad ban thaw kam da lade ïalade khlem da shaniah eh tang ha ki kam sorkar.
U la bynrap ruh ba lynga ki mar ki mata kiba ngi pynmih kin lah ban buria ïa ka jinglut jingsep ha la iing la sem. Ha kajuh ka por u la ai mynsiem ïa ki nongri dohkha hapoh ki Aquarium ba kin ïaleh ban pynroi shuh ïa ki dohkha bad katno ka long ka jingdonbok ïa ki briew jong kane ka thaiñ ha kaba ki la lah mynta ban ïoh ïa kine ki dohkha ban ri ha ki Aquarium ha ki kamra shongkai jong ki.
U la pynshlur ïa ki nongri dohkha ban nang kham pynmih bun ki dohkha bad ban pynïaid iew ïa ki khnang ba kan long ka jingmyntoi bad pynsuk ïa ki paidbah ha kaba kin ym hap shuh ban shaniah ha ki dohkha kiba wan na shabar bad ha ka juh ka por da kaba pynïar pynroi ïa ka rep dohkha ka lah ban kyntiew ïa ka kamai kajih bad ka jingïohnong ïa ki .
U la pynshlur ruh ban ri ïa shibun kiwei pat ki jingri kum ki broiler bad kiwei bad ban ym shaniah than tang na kiba wan nabar bad ban pynmih bun kiwei pat ki mar na ka bynta ban pynïaid iew shabar. U la kyntu ruh ïa baroh ki nongïashim bynta ban nang pynroi pynïar ïa ki kam jongki khnang ba kan ai jingmyntoi ïa ki khun ki kti ki ban long ki nongïoh pateng ïa ki kam ki jam jong ki.
U Superintendent of Fisheries u Bah O.L Passah u la ong ba ka jingthmu jong kane ka Aqua Fest ka long ban pynpaw pyrthei bad ban pyni paidbah ïa ki skhim kiba ka Sorkar ka ai sha u paidbah da kaba kyntu ïa ki briew ban shim jingmyntoi ïa kine ki skhim bad ban wan sha ka stall kaba ki la buh khnang lada ki don kino kino ki jingkylli ha kaba ïadei bad ki skhim kiba ka Sorkar ka ai.
Ka jingthmu jong ka Aquafest ka long ban wanrah bad pyni bad die ïa ki dohkha ba ri ki nongrep ha ki pung ki jong ki, ban pyni ïa ki dohkha bunrong bad itynnad ne ki ornamental fishes, bad kumjuh ruh ban pynsaphriang ïa ki schemes bad ki lad ba bun jait ba ka sorkar ka lah ban ai sha ki paitbah kiba thrang ban trei ïa ki kam kiba ïadei bad ka Fisheries.
U General Manager jong ka District Commerce Industries Centre, Mawkyr-wat u Bah M. War u la ong lyngba kane ka iew pyn-i-nam ki nongseng kam lajong ki lah ban pynpaw pyrthei ïa ki sap ki phong jongki bad ha kajuh ka por kan long kum ka kabu ha kaba ki briew kin ïoh ban peit ïa ki mar bad ban phah wanrah lada ki donkam. Nangta u la ong ba lyngba kane ka iew la kynthup ruh ïa ka homestay bad kiwei kiwei ki lad ai jingshakri kiba lah ban wanrah jingmyntoi ïa ka dong ka thaiñ baroh kawei.