Nongstoiñ, Lber, 22: Ka jingdon jong ka ophis Krishi Viggyan Kendra ha Nongshilong ka la ai jingmyntoi ïa kiba bun bah ki nongrep bad ki nongri jingri ha West Khasi Hills khamtam eh ïa ki nongrep bad ki nongri jingri kiba dei na ki shnong kiba hap hapoh ka Mawthadraishan C&RD Block.
Dang ha ka taïew ba la dep ka KVK Nongshilong ha ryngkat ka jingïatreilang bad ki saïantis napoh ka ICAR ba kynthup ïa u Dr. G.Kndepan senior saïantis napoh ICAR, bad u Dr Samir Das napoh ka NRC Hyderabad u ba dei peit ruh ïa ka ICAR Regional Centre NEH Umïam ki la ïadon ryngkat ban ai jinghikai bad ban pynshai kumno ban ri jingri na ka bynta ban kyntiew ïa ka ïoh ka kot bad ka kami kajih.
Kitei ki saïantis ki la pynshai bniah ha kaba ïadei bad ka kam ri syiar, ri sniang bad kiwei kiwei ki jingri kiba kham suk bad kiba kham ai jingmyntoi ïa ki nonghshong shnong. Ki la pynshai ba lyngba ki lad ki lynti bad ki buit thymmai ba ki la lap ha ka jingwad bniah lyngba ka ICAR, ki hap ban pynsngewthuh sha ki paitbah nongshong shnong bad lada ki nongshong shnong, ki la lah ban bud ryntih katkum ka jinghikai ba ki la ïoh, kan ïarap shibun ban kyntiew ïa ka ïoh ka kot ha kito ki shnong kiba dang don kam shibun ki jingïarap, ban kyntiew ïa ka kamai kajih, ka ïoh ka kot.
La ïoh ruh ban ïaphylliew jingmut bad ban ïatai hapdeng ki nongri syiar bad ki saïantis, ha kaba ki la batai bniah bha kumno ban peit bniah ïa ki syiar ha ka por ba ki dang sdang ban ri na ka bynta ban pynduna ïa ka jingïap.
U Dr Samir Das u la pynshai ruh ba ka jingpynleit jingmut bad ka jingshimkhia ïa ka kam, ka pynshemphang kumno ban kheiñ ïa ka por ban ri katkum ka jinglong ka jaka bad ka jingkylla ka suiñ bneng ha ki aïom bapher jong ka snem.
Hadien kane la sam ïa ki symbai syiar sha ki arphew hynñiew ngut ki nongri syiar na ki khatsaw tylli ki shnong, kiba la wan ban ïashimbynta ha katei ka training ba shi sngi.
