Mynta yn pynkup burom ka Sorkar ïa ka kynhun ïalehkai phutbol ba ïashim bynta ha ka Santosh Trophy
Da ki kali yn ïaid paidbah naduh Madan Heh haduh Madan Ïewrynghep, Laitumkhrah
Shillong, Lber 09 : Ka tnad Sports & Youth Affairs jong ka Sorkar Jylla mynta ka sngi Thohdieng kan pynkup burom ïa ka kynhun ïalehkai phutbol jong ka jylla kiba wan ba ar ha ka lympung ïalehkai 76th National Football Championship for Santosh Trophy 2022-2023.
Kum shi bynta ban ai burom ïa ka kynhun, na ka liang ka tnad Sports & Youth Affairs, kan pynlong da ka jingïaid paidbah da ki kali ne ka Open Truck Road Show, kaban sdang ha ka por 2:30 baje janmiet. Katkum ki jingpynbeit, yn sdang ka jingïaid paidbah na Madan Heh Mawlai Phudmuri – Jaiaw Jingthangbriew – Jaiaw St. Joseph – Jaiaw Langsning – Jaiaw Pdeng – Mawkhar Main Road – Motphran – Police Bazar – AG Office – Additional Secretariat – Barik – Malki Point – Dhanketi – Don Bosco Square – Laitumkhrah Beat House bad pynkut ha Madan Iewrynghep Laitumkhrah ha ka por 4:30 baje janmiet.
Ïa ka jingïalang pynkup burom yn pynlong ha Madan Iewrynghep, Laitumkhrah hadien ba la kut ka jingïaid paidbah kaban sdang ha ka por 4:30 baje janmiet ha kaba u Myntri jong ka tnad Sports & Youth Affairs, jong ka Sorkar Jylla u Bah Shaliar Warjri un ïadonlang kum u Kongsan.