Pynkhreh ka United SC Kolkata ban ïakhun ïa ka Lamare SC la 11 tarik

Nongstoiñ, Lber, 09 : Ka United SC Kolkata ka la long kaba la pynkhreh bha ïalade ban ïakhun ïa ka semi final 2nd leg pyrshah ïa ka Lamare SC Mawlai ha ka 11 tarik ha madan New Nongstoiñ, ka jingïalehkai kaba la ïai ap khmih lynti bha da ki paidbah jong ka sor Nongstoiñ.
Kum ban shu pynkynmaw ba kine ki ar kynhun ki la ïakynduh ha ka semi final 1st leg jong ka lympung phutbol ha Nongstoiñ. Ha ka jingïakhun, ka Lamare SC ka la jop da shi kol la nod. Pynban, mynta ka kynti na ka liang ka Kolkata ka la pynkhreh ym shuh tang ki rang ïalehkai na Kolkata, hynrei da ki rang ïalehkai bar ri kumba katto katne ngut, ha kaba kine ki rang ïalehkai ryngkat bad ka kynhun baroh kawei ki la dep ban poi ha Nongstoiñ naduh ka miet sngi balang jong ka taiew. Kumjuh ruh na ka liang ka Lamare SC ka la pynkhreh bad pynkhlaiñ la ka kynhun da ki rang ïalehkai Santosh Trophy ba na la ka Jylla.
Lah ban kdew hangne ba ha kane ka lympung phutbol ba la tip kum ka ‘Invitation Knockout Football Tournament 2022-23’ ba la pynïaid da ka New Nongstoiñ Sports Social and Cultural Club, kawei na ki kynhun khlaiñ bor kata ka Ri Bhoi United FC na Ri Bhoi District, ka la rung lypa sha ka Final bad ap ïa kawei napdeng kine ki ar kynhun ka ban sa rung final na ka bynta ban ïaknieh pat ïa ka nam lahduh, ha kaba ka song tyngka na ka bynta ka lahduh ka long 7 lak bad ïa kaba wan ba ar ka long 3 lak tyngka.
Na ka liang u Bah G.Syiemlieh President ka NNSSCC lyngba u kyrwoh khubor, u la pyntip sha baroh ki paidbah ba ieit phutbol na kylleng ki jaka, ba kin hiar sha madan New Nongstoiñ ha ka sngi saitjaiñ ban sakhi ïa kane ka jingïalehkai, ha kaba la pyntip ban sdang ïa ka kick off kan long beit thik ha ka por 1:50 noh phai sngi.