Ka Samoi ba thymmai na bynta ki paidbah ka jylla

0

Ka jingwan jong ka sorkar ba thymmai ba la tip kum ka Meghalaya Democratic Alliance 2.0 watla kadei ka kynhun kaba bteng na ka kynhun kaba synshar kaba rim jong ka samoi ba la dep bad ruh hapoh ka jingïalam da kijuh ki nongïalam hynrei kaba kham pher ka long da ka jingdon ki nongïalam ba tbit kiban shong ha ka Liang Pyrshah kiban buddien ïa ka jingtreikam jong ka sorkar ha ki Liang baroh.
Da ka jingshong lang jong ka Congress, Trinamool Congress bad ka Voice of the People’s Party ha ka Liang Pyrshah ka don ka jingkyrmen ba kin rah ia ki mat bad ki ishu kiban tei ïa ka Ri bad ka Jaidbynriew ha ki liang baroh khamtam eh haba ïadei bad ka roi ka pa bad ka jingkiew jong ka jylla ha ki liang baroh. Kawei pat kaba kum ki paidbah ka jylla ki khmih lynti mynta ban ïohi ïa kane ka sorkar ban tuklar noh mardor kadei halor ka jingkit palat ka dheng kali kaba la ktah ym tang ïa ka leit ka wan jong ki paidbah ba leit kamai kajih hynrei khamtam eh na ka bynta kito ki kali ba kit ïa ki nongpang kumjuh ïa ki khynnah skul.
Kane ka dheng kali kadei kawei ka mat kaba ki paidbah nongshong shnong ka jylla jan man ka sngi ki bitar ki thnum ïa ka sorkar da kaba kynnoh ruh harukom hynrei baroh kine ki shu kut tang ha ki saw lyer. Kawei lah ban ong ba katba nangïaid ki snem ka jingdon ki kali ka la nangkiew arshah bad kawei pat ruh kadei namar ka jingdon ki jaka pule tang ha ki shi bynta jong ka sor ba don markhmat bad ka iew ba heh tam ha ka jylla. Lehse lada lah tang ban don sa kawei pat ka iew kaba kham heh ha kiba ba kham pajih jong ka Iewduh ne Motphran lehse ka jingkhapngiah ka la ïarap katto katne khnang ba baroh ki kali kiba eit sha iew ne sha ki jaka pule bad khamtam sha ki ophis ba don sawdong ka secretariat kin ym tyllun hajuh.
Lehse, ka don ruh ka jingkyrmen ba da ka jingpyrshang jong ka sorkar ban pynkynriah noh ïa ka Meghalaya Secretariat sha New Shillong kan ïarap haduh katta katta la kumno 30 haduh 40 persen ïa ka jingdheng kali ha ka nongbah. Kawei pat ka long ba ka don ruh ka jingkyrmen ba hadien ba la dep ka Secretariat ba thymmai kumjuh ka Ïing Dorbar jong ka jylla ba shna thymmai ha New Shillong kine baroh kin sa shu long beit kumba shu weng ïa u shiah uba thar. Lehse kata ka don tang ha ka jingphohsniew jong baroh naba ym tip shuh lano kata kan urlong la kan dei hapoh kine ki san snem lane kan dang shim por shuh shuh sa katto katne snem.
Mynta ban weng ïa kine ki jingeh baroh ka shong ruh ha ka jingstad jong kine ki Myntri ba thymmai jong ka sorkar hapoh ka jingïalam jong u Conrad K Sangma bad Bah Prestone Tynsong kum u Symbud Myntri Rangbah.
Baroh ki kam ki lah ban urlong bad seisoh lut lada jia ba ka sorkar ka skhem bad ïoh ban treikam khlem shah pynkhyllem shiteng por. Tangbd apeit ha kawei ka liang la ïohi ba kane ka sorkar ka skhem bha namar ka ïoh ïa ka jingkyrshan jong ki 45 ngut ba kynthup haduh 26 ngut tang na ka NPP bad 11 ngut na ka UDP. Katba kiwei pat ki party ba kyrshan lang ki don haduh phra ngut kynthup arngut na ka BJP arngut na ka HSPDP, arngut na ka PDF bad arngut ki MLA shimet. Ka don ruh ka jingkhmih lynti ba kane ka samoi ba mynta kan ïoh ban treikam bha khlem da don shuh ki diengpyngkiang kumba la long ha ka khlam COVID kaba la wan ban syllad ha ka samoi ba la dep.
Kane ka sorkar ka hap ruh ban treikam bha naduh mynta khnang ba kan lah ban ban khring bad ïoh ïa ka jingkyrshan jong ki paidbah ha ka elekshon MDC kaban long ha u snem ba la dep bad ruh kumjuh ïa ka elekshon MP kiba long marbud marbud.

Leave A Reply

Your email address will not be published.