Mih u Bah George Lyngdoh ban ïakhun elekshon MDC kum u kyrtong shimet na Umroi

Nongpoh, K’lyngkot, 17: Ka kynhun ba la ïalam da u MDC barim ka Umroi u Bah Arbinus Lyngdoh bad ka kynhun jong u MLA barim ka Umroi Constituency u Bah George B. Lyngdoh ha ka sngi Thohdieng ka la mynjur ban pynïakhun ïa u Bah George B. Lyngdoh kum u kyrtong shimet hapoh ka lama jong ka Umroi Democratic Front (UDF) ha ka election MDC na Umroi Constituency.
Kane ka jingshim rai jong kine ki ar tylli ki kynhun ka long hadien ka jingkhylliap noh ïa ka lama jong ka Umroi Constituency Progressive Forum (UCPF) hadien ba u Bah M.D Syiem u la leit ban pynïasoh sha ka Congress ban ïakhun ïa ka elekshon MDC.
Kane ka jingshim rai ban pynieng ïa u Bah Geoge B. Lyngdoh kum u kyrtong shimet na Umroi Constituency ka la long ha ka jingïalang ha Umroi Umdohbyrthih, Ri Bhoi District, ha kaba ki nongïalam bad ki nongkyrshan na ka Congress bad na ka UCPF ki la shim kawei ka rai ban ïatrei ryngkat na ka bynta ban pynjop donburom ïa u Bah George B. Lyngdoh.
Kumba la sakhi ha kane ka sngi, da ki spah ngut ki nongïalam bad ki nongkyrshan ki la ïalum lang ha ka jingïalang na ka bynta ban ïatai bad ban ïathir bad ban shim ïa ka rai kaba khatduh. Ki nongïalam bad ki nongkyrshan ki la shim ïa ka rai ban ïatrei ryngkat ka kynhun u Bah Arbinus Lyngdoh uba la shah pynduh tiket ha ka Congress bad u Bah George B. Lyngdoh na ka UCPF uba la hap ban ïakhun hi na ka daw ka jingkyntait u Bah M.D Syiem ban ïakhun kum u kyrtong shimet na ka UCPF.
Haba kren sha ki lad pathai khubor hadien ba la wai ka jingïalang, u Bah George u la ong kane ka jingshim rai ban ïakhun ha ka election MDC na Umroi, ka dei hi hadien ba u Bah M.D Syiem u la kyntait ïa ka jingtyrwa jong ka UCPF bad ha kajuh ka por ruh ka jingwan kyrshan ka kynhun u Bah Arbinus Lyngdoh uba la shah pynduh tiket ha ka Congress, ba ka Congress ka la ai pynban sha u Bah M.D Syiem, uba dei u kyrtong ba la ai tiekt dad ka UCPF.
U la ong ruh la lum la lang ïa kane ka jingïalang hadien ka jingïasyllok bad u Bah Arbinus Lyngdoh, uba la ai rai ba u kyrshan ïa u Bah George B. Lyngdoh hadien ka jingshah pynduh ticket ha ka Congress bad na ka bynta ka jingjop ha ka lama jong ka Umroi Democratic Front ki la rai ban ïa trei ryngkat kumba la shim rai lang da ki paidbah ha kane ka sngi.
Ha kawei ka bynta, u la kyntu ruh naduh ki nongïalam bad ïa ki nongkyrshan na ka kynhun u Bah Arbinus Lyngdoh bad ruh na ka kynhun UCPF ba kin trei shitom bad ruh ba ki paidbah ka Umroi Constituency kin ai ïa ka jingkyrshan na ka bynta ka jingjop ba don burom jong u, khnang ba un lah ban dang bteng ïa ka jingshakri kaba paka ïa ki paidbah ka Constituency.
U Bah Arbinus Lyngdoh haba bynrap u la ong ba ka daw kaba la pynlong ïa u ban kyrshan noh ïa u Bah George B. Lyngdoh kum u kyrtong shimet ka dei ka jingshah pynduh ticket ha ka Congress kaba la ai pynban ïa ka tiket sha u Bah M.D Syiem uba la ïoh lypa ïa ka jingtyrwa na ka UCPF.
U la ong ruh baroh shikatta u la trei shitom ban pynkhlaiñ ïa ka Congress ym tang ha Umroi Constituency bad ha Ri Bhoi District hi baroh kawei bad kaba sngewlyngngoh pat ka dei ka jingshah pynduh tiket kum u kyrtong ka Congress na Umroi, kaba dei ka dawbah kaba u la hap ban mih na ka Congress bad ban kyrshan noh ïa u Bah George ha kane ka kynti.