Lada ïoh na ki shipai kan bha eh lada ym ïoh ka Blue Print ba la dep pynkhreh kan treikam beit : Prestone
Halor ka jingpynkynriah ïa ki Harijan na Them Iew Mawlong

Shillong, K’ Lyngkot 17: U Symbud Myntri Rangbah ka jylla uba khmih ïa ka tnat Home (Police) u Bah Prestone Tynsong u la ong lada ïoh ïa ka jaka napoh ka tnat kam ïada ri (Defend Ministry) kan long kaba biang tam ban pynkut noh ïa kane ka kam kaba la sahteng ha kaba ïadei bad ka jingpynkynriah ïa ki 342 tylli ki longïing kiba don hapoh ka Harijan colony kaba napoh ka Them Ïew Mawlong. Hynrei lada jia ba ym ïoh ruh ka Blue Print kaba la dep pynkhreh da ka sorkar ban pynkynriah sha ka jaka ba don ka Ophis Municipal kan treikam beit.
Haba kren bad ki lad pathai khubor ha ka sngi Thohdieng, u Bah Tynsong u la ïathuh “Dang shen ma nga bad u Myntri Rangbah ka jylla u Conrad K Sangma ngi la ïa kynduh ïa u Myntri ka tnad kam ïada ri ha Delhi ban ïakren halor kane ka kam bad na ka liang jong u Myntri ka sorkar pdeng u dang bishar bniah ïa kane ka kam mynta. Ha ka jingïakren la kyrpad ïa ka sorkar pdeng ba kan pyrkhat ban ai ka jaka kumba 2.5 ne 3 acre na ka jaka ki shipai kaba khlem pyndonkam kaba don ruh marpyrshah jong ka petrol pump ha Ïew Mawlong”.
Ka sorkar jylla ka bud dien ïa kane namar ïa kane ka kam la leit ïakren sha Delhi sha u Myntri Kam ïada ri da ki Sikh Community ban ai jaka na ki shipai ban pynkynriah ïa ki Harijan.
“Lada ki lah ban leh ïa kane, nga thikna ba tang hapdeng khyndiat por ngin sa lah ban pynbeit ïa kane ka kam,” u la ong.
Ha kaba ïadei bad ka kam ka Gurudwara, u Bah Tynsong u la ong, “Ngi dang don ha ka lynti ban ïasyllok haba ïadei bad ka jingpynpra ïa kane ka jaka mane namar kat kaba long, ka Harijan Panchayat Committee (HPC) ka la ong ba ki kwah ban ïoh ïa ka jaka kaba don hajan ka jaka kaba rim bad dei halor kane kaba ngi pyrshang ban pynïoh ïa jaka kaba rim da kaba kyrpad ïa ka sorkar pdeng ban pynïoh ïa ka jaka jong ki shipai.”
Ha kawei pat ka liang u Symbud Myntri Rangbah ka jylla u la ong ba ka sorkar jylla ka la dep ban pynkhreh ïa ka blueprint lada ym lah ban ïoh ïa ka jaka jong ki shipai ka blue print kaba la dep pynkhreh kan treikam beit.
“Hynrei lada ngim ïoh, ngi la dep ban pynkhreh ïa ka blueprint. Ka sorkar jylla ka la dep ban pynkhreh nadong shadong bad mynta ki la don ha ki kti jong ngi. Namar kane ka kam ka don ruh ha ka ïing Bishar High Court kumta ngi pyrshang katba lah ban ïa pynbeit shabar ka ïing bishar” u la bynrap.
Haba ong ba ka sorkar jylla mynta ka dang ap ïa ka rai jong ka sorkar pdeng halor kane ka kam, u Bah Tynsong u la ong, “Kumta mynta ngi hap ban ap lada sa shisien pat ba ngin ïoh ïa ka jingkyrkhu jong ka sorkar pdeng ha kaba ïadei bad kane ka jaka, kaba ngi la dep ban tyrwa bad wat na ka liang jong ka HPC dalade ki la dep ban tyrwa ïa kane. Lada ngi ïoh lehse kan dei ka rai kaba bha tam ïa ka jylla,” pynkut u Bah Tynsong.