Na ka jingkyrni dih drok nga poi sha ka tuh, phla u nongtuh ha ïew Nongstoiñ

Nongstoiñ, K’lyngkot 17: Ka jingshah pynpait tala bad pied ïa ki dukan ha ïew Nongstoiñ, ka la jyllei haduh katta katta ha kine ki snem. Dang ha ka step jong kane ka sngi balang ka 15 tarik Kyllalyngkot, ki nongshong ïew ki la ïoh ban bat ïa uwei u briew u ba kyrteng u Rimon Kharbani 24 snem, u ba sah wai bad u Kñi jong u ha kawei ka ïing hajan ka K.L Complex, katba u dang pang prong jubor ïa ka dukan die jaiñ jong ka kong S.Khardewsaw hapoh ïew.
Hadien ba ki la ïoh bad ïa u ki la teh bad tohkit ïa u ban lap ïa kiwei pat kiba don kti lang. Ha ka jingtohhkit utei u briew um shym la ïathuh satia, hynrei hadien ba ki paitbah ki la ïa pra noh la ka jong ka jong, u nongthoh khubor u la pyrshang bad ïasyllok bad kylli jar jar ïa u ha kaba u la ong ba na ka daw ba u la kyrni ha ka jingdih drok, u la hap ban poi sha ka leit pied dukan bad ban leit tuh ruh.
Nalor kata u la ong ruh ba la bunsien bha u la leit pied ïa ki dukan bad ïa ki mar ba u ïoh u ju die ha ki para lok kiba u la dep ïakut dor. U la ong ruh ba tang u kwai ruh la bun byrni u la ïoh na ki dukan ba u leit pied.
Haba kylli ba ki don katno ngut ki paralok kiba ju don bynta bad u ha kaba leit tuh bad pied dukan, utei u briew u la ïathuh khlem jingsalia da kaba ong ba ki don sa lai ngut kiwei pat kiba ju ïadon bynta bad u ha kitei ki kam.
Haba kylli pat ha ki nongshong ïew bun bah kiba la ong ba ki dukan jong ki ki la shah pynpait tala bad shah kyndang man ka por. Uwei pat u ba shong dukan ba la tip kyrteng kum u bah P.Marbaniang, u la ong ba ka dukan jong u ka la shah pied bad shah pynpait tala haduh khat lai sien.
Ha katei ka sngi tang hadien katto katne por ki pulit ki la ïoh jingtip bad ki la wan ban shimti noh ïa utei u briew bad ki la rah ïa u sha thanad ban pynlong ka jingtohkit kaba bniah.
Ha kaba ïadei bad ka jingjyllei jong ki kam tuh kam thiem hapoh ïew haba kylli ha ki ki nongshong dukan, ki la ong ba ha ki snem ba la dep haba kiba kit daju kiba sah ha ïew ki da shimkhia ban pahra ha ka por mynmiet ka jingshah tuh bad shah pied dukan ka dang duna bha. Hynrei hadien ba ka ophis u Syiem ka hima Nongstoiñ kam ailad shuh ba ki daju kiba sah ha ïew, ka jing shah pied dukan ka la jur bha.
Ki la ong ruh ba ka jinglong jingman hapoh ïew Nongstoiñ ka la nang sniew nang katba nang mih ki sngi, namar ka jingbym shimkhia jong ka ophis u Syiem. Nalorkata ka jingbun jong ki ïing jah hapoh ïew, ka dei ka kabu kaba khraw ïa ki riew jakhlia kum ki nongkhaïi drok, ki nongtuh bad kiwei kiwei ba kin ïoh jaka rieh.