Yn pynïoh u Bah Sniawbhalang Dhar 3 klur ka surok bad 10 lak ïa ka Secondary School
Ïoh ka shnong Nongkhroh ïa ka Community Hall thymmai

Jowai, K.Lyngkot, 17: Ka Dorbar Shnong Nongkhroh West Jaiñtia Hills District ha ka sngi Thohdieng la ïoh ïa ka ‘Community Hall Nongkhroh’ ba thymmai ïa kaba la plie paidbah da u MLA u Bah Sniawbhalang Dhar uba long ruh u Symbud Myntri Rangbah jong ka sorkar jylla
U Bah Sniawbhalang Dhar ula ong ba ka jingurlong ban ïoh ïa kane ka ïingdorbar ka dei da ka jingïatylli lang jong baroh ki nongshnong shnong ka Nongkhroh, ula ai ruh ka jingïaroh ïa u Waheh Shnong ka Nongkhroh uba don shisha ïa ka mynsiem trei shitom na ka bynta ka shnong ka tnaw.
Kum u MLA jong kane ka thaiñ u don ka jingkitkhieh na ka bynta kane ka shnong kaba hap hapoh ka Constituency jong u bad kaba la pynjop don burom ïa u ha kine samoi ban long kum u MLA. U la ong wat ïa ka surok ban poi sha kane ka shnong na ka liang jong u, ula pynbna haduh 3 klur tyngka ban pynshna noh ïa ka surok ha kine ki khyndiat bnai.
Ha kaba ïadei bad ka pule ka puthi hapoh jong ka shnong, u Bah Sniawbhalang Dhar ula kular ban pynkiew kyrdan ïa ka Upper Primary School sha ka Secondary School da kaba ïarap pisa haduh 10 lak tyngka ha kane ka taiew ban wan ban shna noh ïa ki Additional Room.
Na ka bynta ki jingdonkam ka shnong ula kular ïa baroh ki nongshong shnong ka Nongkroh ba ka jingkhang jong u ha Secretariat ka plie baroh 24 kynta ïa kiba donkam ban ïakynduh ïa u, da kaba ong ha ka por elekshon kum u kyrtong u wan ban pynthut na ka bynta ban ïalap Election ban mynta ka dei ka kynti jong ki nongshong shnong ban wan pynthut ïa la u jong u MLA.
Ha kane ka sngi la ïadonlang naduh u MDC ka thaiñ u Bah Jesse Suïam, u Waheh Shnong Bah Ekwin Rynjah, u Secretary Shnong bah Kyrmenlang Rynjah, ki nongïalam shnong, ki longkmie ki longkpa, ki khun samla nalor kiwei kiwei.
Kiwei kiba ai jingkren ki la pynpaw ka jingsngewnguh ïa u MLA uba la ïarap ïa ka shnong ha kiba bun ki liang, da kaba ong ba ka jingïoh jong ka shnong ïa kane ka Dorbar Hall kan ïarap shibun eh ïa ka shnong ban pynïaid ïa ki kam ki jam lyngba ki jingïalang paidbah.
La pynphuh shuh shuh ïa kane ka sngi da ki jingrwai bad ki jingshad na ki nongshong shnong ka Nongkroh.
Shwa ban pynkut u Bah Sniawbhalang Dhar ula plie pyrda ïa u mawnongrim bad ban ot ïa u ribon jong kane ka ïingdorbar.
Kum ka dak jong ka jingburom ban sah kynmaw ka shnong ka la ai sngewbha da ka momento ïa u MLA.