Mih pyrthei u Bah Synshar Khymdeit, kyntait ba dawa pisa ha kyrteng ka HNLC

Shillong, Nailar 01: U Bah Synshar Khymdeit, uba la shah pynmih khubor ba u phah shithi dawa pisa ha ka kyrteng ka HNLC, mynta ka sngi, u la mih pyrthei ha ki lad pathai khubor ban pynshai ba um dei satia ma u, uba la phah shithi dawa pisa ha ka kyrteng ka HNLC.
“Ngam dei satia uta u Synshar Khymdeit kumba la soi ha ki shithi dawa pisa ha kyrteng ka HNLC bad uba la kam ruh kum u Area Commander jong ka Seng”, la ong u Bah Synshar ha ka jingïakren bad ki nongthoh khubor ha Shillong Press Club.
U Bah Synshar uba la wan lang bad u hymmen jong u ryngkat ka jingïadonlang ruh ki nongïalam jong ka Seng HNYF, u la ong ba mar synïohi ïa ka jingmih khubor, wut wut u la leit mih sha ki Pulit ban pynshai ba um dei satia ma u, bad u la ujor ruh da ka ejahar sha ki Pulit halor kane.
U la ong ba um shym la mih ban pynshai paidbah namar u mut ba ka la biang haba la pyntip sha ki Pulit. Hynrei haba la mih khubor biang ba la don ki briew kiba kiba la shah dawa bad kiba la siew ïa ka pisa katkum ka jingmih ha ki lad pathai khubor, um banse ban mih shakhmat ban pynshai namar kane ka buh ruh ïa ka jingim ha ka jingma.
Une u Samla uba dang 25 snem ka rta, u la ïathuh ba um pat ïakren than ïa kane ka kam ha ïing ha sem namar ba i kmie jong u, i don hapdeng ka jingshitom.
Ha shuwa ba un wan ïakynduh ïa ki nongthoh khubor, u Synshar u la leit ïakynduh shuwa ïa ki nongïalam ka HNYF, namar ba ki nongïalam kane ka Seng hynnin ka sngi, kila ai ka jingmaham kaba tyngeh ïa kito kiba dawa pisa ha ka kyrteng ka HNLC bad namar ba u President ka Seng, u Bah Sadon Blah, u ïadon bynta ha ka jingïakren ïasuk hapdeng ka HNLC bad ki bor sorkar, namar ba udei u Ksiang ka HNLC, ka HNYF ka mih shakhmat ban ai ka jingmaham ïa ki paidbah bad ka wer ruh ïa kito kiba shah dawa pisa ba kidei ban mih shakhmat ban pyntip, khnang ban lap ïa ki briew kiba donkti.
U Hymmen jong u Synshar, u Bah Kyrshan Khymdeit, uba don lang ha ka jingïalang bad ki nongthoh khubor, u la kren da kaba skhem ba u para jong u, um tip eiei halor ki shithi dawa pisa, hynrei u la ong ba don ki briew kiba la pyndonkam da ka kyrteng jong u, ïa kaba u la ong ba kane ka buh ïa u para jong u ha ka jingma.
“Ngim tip kumno kine ki briew kiba pyndknam ïa ka kyrteng jong u, ki tip ïa ka jaka sah u Synshar ruh”, u la ong
Na ka liang u Bah Synshar bad kumjuh ruh ki nongïakam ka HNYF, ba la mihkhmat da u Bah B. Dkhar, President ka HNYF East Khasi Hills, ki la kyntu ïa ki Pulit ba kin thwet kloi ïa ki briew kiba la pyndonkam ïa ka kyrteng jong u Synshar khnang ba kan nym buh ïa ka ïaid ka ïeng bad ka jingim jong u ha ka jingma.