Mih ka kynhun kaikhlaw thymmai ki Karbi, shong syier ki Khasi-Pnar basah ha Block-I

Jowai, Nailar, 01: Ki paid nongshong shnong jong ka Elaka Labang Nangphyllut Pangam Raliang kaba tip paitbah kum ka Block-1 ki la pynpaw ïa ka jingsngewsyier halor ka jingmih pyrthei jong ka kynhun kaikhlaw bathymmai jong ki Karbi kaba la tip kyrteng kum ka United People’ Front of Karbi Long (UPFKL) katkum ba la paw ha kawei na ki lad pathai khubor Local News jong ki Karbi ha ka 29-30 tarik, Naitung, 2023.
Arngut na ki dkhot jong kane ka kynhun kieng atiar ki Karbi ki la shah kem ha ki Pulit jong ka Manja Police Station, Karbi Anglong ïa kiba la tip kyrteng u kum u Sanjay Ingtih bad Rajesh Phangcho na ka shnong Jrikyndeng kaba danghap hi hapoh Block-1.
Katkum kane ka khubor, la ïathuh, na kine ki arngut kiba la shahkem la ïoh kurup shibun ki shithi dawa pisa ha ka kyrteng jong ka United People’ Front of Karbi Long (UPFKL). Ym shym la ïathuh ka kyrteng jongno la thoh ha kine ki shithi dawa pisa, hynrei la ïoh jingtip ba kine ki shithi ki lah ban don ki kyrteng jong ki Khasi-Pnar ruh.
“Katkum ka jingtip kaba la ïoh lyngba ki briew kiba ngi la phah tohkit la ong ba kane ka kynhun ka don kumba 500 ngut tam ki dkhot bad ka jingthmu jong kane ka seng kieng atiar ka long ban pyntieng pynsmiej ïa ki paid Khasi-Pnar ba kin ym nud ban leit ban wan bad ban dawa ïa ka hok jong ki ban don beit shapoh Meghalaya bad ban pynshitom ïa ki harrukom kumba ju jia ha ki snem 2000 haduh 2012, 2013,” la ong u Chairman ka Hynñiewtrep Border Disputed Redressal Forum (HBDRF) Bah Chandame Sungoh.
“Ki paid nongshong jong ka Elaka Labang Nangphyllut bad ka Hynñiewtrep Border Disputed Redressal Forum ka la pyntip ïa ki paradoh parasnam jong ka Bri u Hynñiewtrep bad ïa ki Sengbhalang baroh kiba don hapoh ka Rilum Khasi Jaiñtia ba kin tip ban long kiba la khreh ba lada jia kaei ka ei kaba sniew ïa ki paradoh parasnam jong ngi ban ïoh ïarap. Kum ki pait nongshong jong ka Labang Nangphyllut Pangam Raliang ki kyrpad ïa baroh ki khun ka Bri u Hynñiewtrep da lei dalei kim dei ban iehbeiñ lada jia ka jingshah thombor ha kine ki lehnoh lane ki paid Karbi,” ong u Bah Sungoh.
“Kum ki paid nongshong bad ka Forum ki kyntu ruh ïa ki paid Karbi ba kim dei ban thaw kum kane ka buit bymman ban wanrah ïa ka jingïa umsnam lane sngewpher jaitbynriew. Kum ki nongshong shnong ki kwah ïa ka shongsuk shongsaiñ bad lada ki Karbi ki dang ïai kynroi ngim ban se ban thawlad ban ïada ïalade,” u la ong shuh shuh.
“Na ka liang jong ka Forum kan ym ieh ïa ki Karbi kiba shong basah hapoh Meghalaya ba kin ïoh shongsuk shongsaiñ lada ki Khasi Pnar ba shong basah hapoh Karbi Anglong kin shah pynshitom bad shah lehbeiñ. Kumta ngi kyntu ïa ki Karbi ba kin long kiba ïa ieit markylliang bad ban burom markylliang khnang ba kan don ka shongsuk shongsaiñ kumba juh long naduh ki phew phew snem ba la leit,” la kyntu une u nongïalam ka Forum.
“Kum ki paid nongshong shnong bad ka Forum ngi ai ka jingïatrei lang bad ka Sorkar na ka bynta ka jingpynkhreh ban pynbeit ïa u pud u sam bad ngi kwah ba ki ar Sorkar kin pynbeit ïa u pud u sam da ka lynti jong ka jingsuk bad ki paid Khasi-Pnar jong kane ka thaiñ kin ïoh ïa ka hok jong ki. Ngi kyntu ruh ïa ka Sorkar Assam-Meghalaya ba kin shimkhia ban thwet ïa kine ki lehnoh bad ban pynduhjait ïa ki khnang ba ka shongsuk shongsaiñ kan wan phai,” ong shuh ka Forum.