Shillong, Nailar, 01: Lyngba ka shlem hikai shad kaba don ha Dongkadiang, Nongmensong kaba la tip kyrteng kum ka EDI Dance Academy, ar ngut ki samla shynrang kiba la tip kyrteng kum u Steve Jyrwa (16 snem) bad u Ashmit Gurung (18 snem) ki paw mynta ha ka rynsan ïakob shad Hip-Hop India ha Mumbai ïa kaba la pyni paidbah lyngba ka Amazon MiniTv.
Ïa kane ka rynsan ïakob shad, kaba dei man la ka sngi thohdieng, la bishar da ki khlur ak phlim bad nongshad ba pawnam ka Bollywood kata ka Nora Fatehi bad u Remo D’Souza.
Kine ki khynnah hadien ba ki la shah jied na ka Audition ha Kolkata ki la shah jied pat ban ïakhun ïa ka Final Audition ha Mumbai ha ki khyndiat sngi ba la dep bad hadien ka jingshad jong ki ka Nora bad u Remo ki la ai 100 points namar ka jingtbit jong ki bad kum ka lad ban jam sha khmat ha ki kyrdan ïakob jong kane ka rynsan ïakob shad.
Ka Nora bad u Remo ki la ïaroh jur namar ka jingsted bad ka jingbiang por jong ki ha ka rukom shad naduh kaba pynkhih ïa ki kti ki kjat bad ka met bad haba kut ki jingshad kine nongbishar ki da ïeng ruh ban ai mynsiem shuh shuh ïa u Amit bad u Steve.
Kine ki ar ngut ki dei kiba la shah hikai ha katei ka Academy la kumba 7 snem eiei da ka trai jong kane ka Academy, ka Kong Zarina Jyrwa ha ryngkat u Rohit Singh Rajput.
“Ki dei ki khynnah kiba trei shitom bad pynleit jingmut bha haba shah hikai”, la ong ka Kong Zarina kaba la ïathuh ba ki khynnah kin hap ban kyrshan nalade ïa ka jinglut jingsep haba ki leit ïa shim bynta sha ki rynsan bapher bapher.
“Ynda la poi sha ki bynta ban poi sha ka Grand Final ki khynnah kin sa ïoh jingkyrshan na katei ka rynsan ïakob”, ka la ong da kaba pynpaw ka jingkhmih lynti ba u Steve bad u Amit kin trei shitom ban wanrah burom ïa ka Academy bad ïa ka Jylla hi baroh kawei.
Halor ka rukom sei sap shad u Steve bad u Amit, ka Kong Zarina ka la ong ba ka long kaei kaei kaba sngewkmen bad sngew sarong na ka bynta jong ki haduh ba ki nongbishar ki da ieng ban ai mynsiem bad ïaroh ïa ki.
“Nga don ka jingngeit kaba skhem ba u Steve bad u Amit kin long ruh ka nuksa ïa kiwei pat da ka jingtrei shitom bad jingpynleit jingmut jong ki bad kin ïoh ban wan sha khmat ban jop ïa kane ka rynsan”, ong ka Kong Zarina da ka jingsngew skhem bad bynrap ba kine ki ar ngut ki dang don ha Mumbai bad ki donkam ïa ka jingkyrshan bad jingïarap na ki paidbah ka Jylla.
