New Delhi, Nailar 01: Ka Supreme Court jong ka ri India ka la khyrwit tyngeh ïa ka sorkar Manipur ha kaba ïadei bad ka jingïaumsnam ha katei ka jylla kaba la jia naduh ka 3 tarik u bnai Jymmang mynta ka snem.
Haba shim bishar naduh hynnin ka sngi, ka ïingbishar ba la khlieh da u Chief Justice ka ri India, u Justice DY Charndrachud, ka la ong Manipur ka synshar khadar bad ka aiñ kam don shuh, bad ki briew ki la shu im rit mynsiem. Na ka liang ka ïingbishar ka kwah ban tip katno tylli kiejahar la ujor naduh ba la jia ka jingïaumsnam. Nangta katno ngut ki briew la kem. Ka la buh jingkylli ruh balei ba ki ejahar ki slem ban rejistar bad balei ba ki Pulit kim shimkhia haba don ki ejahar ba wan ujor da ki briew.
Ka ïingbishar ba hakhlieh duh jong ka ri, ka la ong ruh ba ka long kaba bakla ban pynïanujor ïa ka jingjia ha Manipur bad kiwei pat ki jylla khamtam ïa ka jingshah pynïaid lyngkhuid ki arngut ki kynthei. “Phim lah ban aidaw ïa kiwei ki jingjia ha kiwei pat ki jaka jong ka ri India bad kaba la jia ha Manipur”, la ong ka u Justice Chandrachud, da kaba bynrap ba kaba jia ha Manipur kadei ka jingïaumsnam jaidbynriew bad kaba thmu ban pynjah klep ïa ka jaidbynriew.
Halor kane ka jingjia u Nongbishar ba rangbah duh u la ong, “Ka jingjia ka la jia naduh ka 4 tarik u Jymmang, kumno dang ujor ejahar haduh ka 26 tarik u Naitung”. U la ong ruh ba ym dei ban aidaw halor ka nongrim ba kane ka jingjia ka la jia sha kawei pat ka jaka.
U Nongbishar ba ha khlieh duh jong ka ri u la hukum ruh ïa u Director General of Police (DGP) ka Manipur ba u dei ban wan mih hi dalade ha ka sien shong bishar biang sa shisien bad udei ba pynbiang lut ïa baroh ki jingkylli kiba la wad jingtip ha kane ka jingbishar.
