Marwei ngin nym lah ban ïaleh hynrei donkam ïa ka jingïatreilang ban jop ïa ka thma : Donbok Kharlyngdoh

Mawkyrwat, ‘Nailur 12: Ka Hynñiewtrep Youths’ Council (HYC) jong ka South West Khasi Hills District mynta ka sngi ka 12 tarik u ‘Nailur, 2024 ka la ïoh ban rakhe ïa u mawmer jong ka jingdap 10 snem ha ka jingïaid lynti ban shakri ha ka imlang ka sahlang bad ïa ka ri bad ka jaidbynriew ha kaba ki la pynlong ka jingïalang ha madan MDSA, Nonglang, South West Khasi Hills District.
Shwa kata, ka la don ka jingpynïalehkai kynjatbol hapdeng ki 5 tylli ki Circle kaba ki ai kyrteng ka Friendly Football Match, bad ki kynhun kiba la poi sha ka phainal ki long ka HYC jong ka South Lyngngam Circle pyrshah ïa ka HYC jong ka Sawsymper Area Unit, ha kaba ka HYC jong ka South Lyngngam Circle ka la jop noh da 2 – 0 kol.
Ha ka jingïalang ba lyngkot hadien ba kut jong ka jingïalehkai, u bah Donbok Kharlyngdoh, Vice President jong ka HYC Central Body haba kren u la pynpaw ka jingaikhublei kaba kyrpang ïa ka HYC jong ka South West Khasi Hills District kaba la kynjoh mynta ha ka jingdap 10 snem.
“Haba phai dien ïa kine ki snem kiba la leit naduh ba la wan suit wan shor ïa ka HYC ha kane ka distrik naduh u snem 2014, 12 tarik u ‘Nailur, ula ong ki la don hapdeng ki jingeh kiba bun namar ki bun ki nongkynthoh, hynrei haba ki don ka jingthmu ban trei namar ka jaidbynriew ïa kita ki jingeh baroh kim shym la pynsngap hynrei da ka mynsiem jong ka jingshlur ki la tur bad ïaid shakhmat bad la ithuh ïa ngi da ka jaidbynriew lyngba ki kam ba kum ka seng ka la trei bor bah”, u la ïathuh.
“Kumba na ka Central Body ka la wan bet ïa u symbai ha ka 12 tarik u ‘Nailur, 2014, bad mynta ka sngi ka 12 tarik u ‘Nailur, 2024 ka la dei sa ka por ban wan peit la u jingthung u long uba kumno bad kumba ki marjan marpa, ki nongïalam shnong, ki nongïalam seng samla ki la ïathuh ba uta u jingthung u la mih kita ki soh, bad ki thied ruh ki la ngam ban pynskhem ïa u jingthung bad ki tnd ki nangkaweh sha suiñ”, u la ong bad kumta ruh kan long ïa ka HYC South West Khasi Hills District, ba kan nangtrei bad pyntyllun ïa ki kam kiba rad bah nangne shakhmat hapoh ka ri bad ka jaidbynriew.
Haba kren pat ha kaba ïa dei bad ka jinglong jingman ha kum kine ki sngi ba ka jingma ka ap ïa ka jaidbynriew, u bah Donbok Kharlyngdoh ula ong ba kat shaba phai ki jingsniew ki la nang jyllei khamtam eh ki jingsniew na u drok kiba ap thap ïa ki khun samla, bad ïa kane kum ka HYC ka la don hapdeng ka jingïakhun kaba shyrkhei bha kumno ban pynduhjait hynrei kam lah tang marwei. Namarkata, u khot u wer ïa ki paidbah nongshong shnong jong ka ri bad ka jaidbynriew ba kin ai ka kti ka mon ka kti ka diang ban ïatreilang khnang ba yn lah ban jop ïa kane ka jingïaleh bad ban rad-dyngkhong syndon.
Katba ha ka jingkren jong u bah Arbok Kharjahrin, President jong ka HYC South West Khasi Hills District u la pynkynmaw ba hapoh ka HYC South West Khasi Hills District ki don baroh 6 tylli ki Circle kiba long ki nongtrei ba shitrhem ban ïada ïa ka ri bad ka jaidbynriew. Ym tang kata, u la ïathuh ai khublei ba kyrpang ïa ki nongïalam kiba dei ki nongkitkam ba hakhmat eh naduh ba la suit la shor ïa ka HYC South West Khasi Hills District kata u bah Baristar Nongsiej kum u President ba nyngkong, u bah Ialam Rngaid kum Secretary ba nyngkong kiba la long ka daw jong ka jingkynjoh jong ka seng ha u mawmer ba 10 snem.
Namarkata, ka donkam ba nangne shakhmat kumba ka seng ka kynjoh mynta 10 snem, ai ba ka jingïaid lynti jong ngi ruh ngin nang pyntyllun ïa ki kam kiba bun khnang ba ka ri bad ka jaidbynriew kan im.
Ha kane ka sngi la donlang naduh u bah R.R. Lyngkhoi, Myntri Shnong Mawkyrwat, u bah Wallambok Syiemiong, Chairman jong ka Synjuk ki Seng Samla Shnong, South West Khasi Hills District, u bah Enlang Sawiang, Education Secretary HYC Central Body bad u bah Yoodahunky Shylla, Joint Secretary HYC Central Body bad In-charge HYC South West Khasi Hills District.
U bah Pynskhem Kharjahrin, Secretary ka HYC South West Khasi Hills District u la pynïaid ïa ka jingïalang bad ai ruh ki kyntien khublei.