Nongpoh, Naiwieng 26: Ka jingwan poi ki Nongñiah Scooty bad ki Nongñiah Bike da ki kynhun kynhun man la ka sngi na ka jylla Assam kum ka jingwan kai suwari ha ka surokbah National Highway-6 ha Ri Bhoi wat ka dei tang ka jingpyrbyrngia kum ki samla, hynrei haba phai pat sha ka rukom ñiah jong ki, ka long kaba ishyrkhei bad kaba buh jingma ym tang ïa ki bad ka buh jingma ruh wat ïa ki paidbah ba leit ba wan.
Kumba la sakhi, ki samla naka jylla Assam manla ka sngi u Blei ki ju wan beit da ka kynhun kynhun kum shi paralok ban pynlut por ban shangsuwari da ki Scooty bad ki Bike bad kumba la ïohi ne sakhi ka jingwan jongki ha ka jingshisha ka dei tang ka jingïasngewtynnad shi paralok ban pynher ïa ki Scooty bad ki Bike ba ki ñiah, hynrei bunsiem pat lada peit kiwei kiba nabar ka long ka jingsngewshyrkhei ha kaba ka jingpynher jongki ïa ki Scooty ne ki Bike ka la long shaba palat liam.
Haba kren halor kane ka bynta, la ju don ruh ki khem kiba mih ki jingjia ba sngewsih ha kaba tang na ka daw ka jingñiah khlem akor ïa ki Scooty ne ki Bike ka mih ka jingjia ba sngewsih, hynrei haba kren halor kane ka bynta bun kim pat sngewthuh bad dei tad haduh ba ki la kynduh ïa kum kitei ki jingjia ba sngewsih kin sa sngewthuh ba ki la leh ïa kaba bakla.
Ka jingwan jongki ban shangkai sha kane ka surokbah kam don satia kano kano ka jingkhang ne ka jingpyrshah bad ki don ruh ïa ka hok kum kita ki nongshong shnong ka ri India, hynrei kaei kaba sngewkhia ka dei tang ka jingñiah khlemakor ïa ki Scooty ne ki Bike kaba la buh jingma shisha ïa ki bad wat ïa ki paidbah namar ka jingpynher ïa ki Scooty bad ki Bike la sngewthuh tang ka sur ba mih na ki scooty bad ki Bike ha kaba ym ïa hap shuh ïa kata ka rukom ñiah jong ki.
Kum kine ki jingñiah khlemakor ïa ki Scooty ne ki Bike la dei ban tehlakam ym tang ïa kitei ki samla kiba wan na kiwei ki jylla, hynrei wat ïa ki samla trai jylla, namar lada ailad ba kin leh katba mon ban leh sngewbha kan sa poi ka por ba mih ki jingjia ba sngewsih bad lada mih pat ki jingjia ba sngewsih ïano yn kynnnoh.
