Shillong, Naiwieng, 26: Ka Employment Monitoring Cell jong ka Khasi Students’ Union (KSU) ha ka sngi Thohdieng ka la dawa ïa ka skulbah North Eastern Hill University (NEHU) ban ailad kyrpang ïa ki samla khasi kiba thep ïa ki kam Non Teaching Posts jong ka Grade-B bad C ba ka skulbah NEHU ka dang shu pyllait shen.
Ka seng hapoh ka jingïalam jong u Chairman ka Employment Cell u samla Reuben Najiar ka la ïakynduh ïa u Vice Chancellor jong ka skulbah NEHU u Prof Prabha Shankar Shukla ban ïakren halor kane ka bynta.
Ha kane ka jingïakynduh ka seng ka la pynkynmaw ïa ka jingïakren hapdeng ka seng bad u Vice Chancellor kaba la long ha ka 16 tarik, Nailar 2023 ha kaba ka seng ka la dawa ban ailad kyrpang ïa ki samla Khasi kiba thep ïa ki kam ha ki kyrdan bapher bapher jong ka skulbah NEHU.
Ka seng ka la pynpaw ruh ha u Prof Shukla ba ka jingdon jong ki samla Khasi ha ki Department bapher bapher jong ka skulbah NEHU kan wanrah ïa ka jingai jingshakri kaba pura namar ka jingsngewtrai ka jong ki ïa la ka skulbah NEHU kaba don hapoh ka jylla lajong.
Kumjuh ka seng ka la ïaiban ruh ïa ka jingjia ba dang shu jia shen hapoh NEHU ha kaba wei u ophisar jong ka NEHU u la thmu ban leh be-ijot ïa kawei ka samla Khasi ha ka 19 tarik mynta u bnai bad kane ka la pynshong syier ïa shibun ki samla pule kiba pule hapoh ka skulbah NEHU. Ka Seng ka la pynpaw ba na ka liang ki bor ba dei khmih ïa ka NEHU kim dei ban ailad ba kum kine ki jingjia kin nang jia shuh bad ban pyntikna ruh ïa ka jingshngaiñ jong ki samla pule kynthei kiba pule hapoh ka skul bah.
U Vice Chancellor u la mynjur ïa kaei kaba ka seng ka la buh jingdawa hakhmat jong u bad u la ai ruh ïa ka jingkular ba ka skulbah NEHU kan ailad kyrpang ïa ki samla Khasi kiba thep ha ïa ki kam bapher bapher bad kiba lah ban pyndep ïa ki kyndon ba ka NEHU ka dawa.
