Shillong, Naiwieng 26 : Ka Khasi Hills Autonomous District Council (KHADC) ka dang pynkhreh ban lum khajna bad ban pyntip sha ka sorkar katno tylli ka don ïa ki khyrdop lum khajna kiba ka la ai jingbit ban lum khajna hapoh u pud u sam jongka.
U CEM ka KHADC u bah Pyniaid Sing Syiem u la ïathuh ba ka Council ka sngewkhia bha halor ka jingjyllei ki khyrdop lum khajna hapoh u pud u sam ka Khasi Hills.
“ Ngi dang lum jingtip ban tip katno tylli ki don ki khyrdop lum khajna kiba la ai jingbit da ka KHADC bad hadien ba la dep lum jingtip katno tylli ki don yn sa phah lang sha ka tnad District Council Affairs (DCA) bad kumjuh ruh sha ka tnad kam Aiñ ka jylla.
“ Nga ngeit skhem ba ha kaba kut une u bnai Nohprah ngin sa ïoh jingtip katno tylli ki don bad tang kito ki khyrdop kiba la ïoh jingithuh bad ai jingbit da ka KHADC kiba lah ban treikam kata naduh ki khyrdop lum khajna, ki khyrdop jongka tnad kam khlaw ka KHADC, ki khyrdop jong ka tnad Revenue lane Trading by Non Tribal” ong u CEM.
U la ïathuh ba la bthah ïa u Secretary ka Executive Committee ban pynkhreh ïa ka thup (list) jong kine ki khyrdop lum khajna kiba don hapoh u pud u sam ka District Council.
Ha kaba ïadei bad ki toll gate ka don ka committee kaba la khlieh da ka District Council Affairs (DCA) ha kaba baroh ki Autonomous District Council (ADC) ki long ki dkhot kynthup ruh na ka tnad PWD, ïathuh u bah Pyniaid.
U la ïathuh ba kine ki khyrdop ruh ki treikam kat kum ki kyndon jongka Sixth Schedule, Forest Act, Trading by Non Tribal Regulation bad kiwei kiwei.
