45-60 sngi pan kaiphod ka Sorkar na ki Consultant ban shna pynheh ïa ka jaka pynher liengsuiñ ha Umroi

Shillong, Naiwieng, 26: Ka Sorkar Jylla ka la ai por saw phew san haduh hynriew phew sngi ïa ki Consultant ban phah ïa ka kaiphod halor ka jingthmu ban shna pynheh ïa ka jaka pynher liengsuiñ ha Umroi Airport khnang ba ki liengsuiñ kiba heh kin dup lah ban hiar khyndew.
“Ngim pat tip la ka long ne kam long ban shna pynheh ïa ka jaka ba ki liengsuiñ kiba heh kin dup lah ban hiar khyndew. Namarkta, ngi dang ap ïa ka kaiphod na ki Consultant hapoh 45-60 sngi,” ong u Symbud Myntri Rangbah ka Jylla uba peit ïa ka tnat Transports u Bah Sniawbhalang Dhar.
U la ong ba la thung ïa u Consultant ba thymmai hadien ba la ïoh ïa ka kaiphod ba la phah da uwei na ki Consultants ba la thung dang shen da ka Sorkar, kaba pynpaw ba ka jinglut kan kot haduh T. 7,000 klur ban shna pynheh ïa ka jaka pynher liengsuiñ. Kane ka dor kan kynthup ruh naduh kaba ot ïa ki lum.
“La lap ba ka dor kam long satia kaba ïahap. Dei na kane ka daw, ngi la phah sa kawei ka kynhun. Mynta ngi dang ap ban ïoh ïa ka kaiphod kaba thymmai bad ïa ka rai yn sa shim da ka Sorkar Jylla,” la ong u Bah Dhar.
Ha ka 30 tarik u Risaw, ka Ingbishar Meghalaya High Court ka la kyntu ïa Sorkar Jylla bad ïa ki bor ba dei peit jong ka Airport Authority of India (AAI) ban pyndep noh ïa ka jingleh sorjamin ha Umroi Airport na ka bynta ban shna pynheh ïa ka jaka pynher liengsuiñ hapoh ar bnai ban sa wan.
Ka la ong ba ka AAI ka la yntip ba ka dor na ka bynta ban shna ïa ka jaka pynher liengsuiñ ha Umroi Airport la dep phah sha ka Sorkar Jylla bad ka Sorkar Jylla kam pat ai jubab.
U Bah Dhar u la ong ba ka Sorkar ka kwah ban pynlong ïa kane ka kad liengsuiñ kaba lah ban hiar khyndew wat ki liengsuiñ kiba heh.
Ha ka 10 tarik, Nailar, ka AAI ka la pyntip ba ka Ingbishar kan sa pynlong ïa ka jingsorjamin ha Umroi Airport khnang ban lap la ka jaka ka long neem kaba lah ban pynheh ban pynhiar khyndew ïa ki liengsuiñ kiba heh ban ïa ka ATR bad Bombardiers ha ka kad liengsuiñ Umroi.