Shillong, Naiwieng 27: Ka resol jong ar tylli ki jingïakhun ka lympung SSA 2nd DIVISION Football League 2023 ba la long hynne ka Sngi ha SSA Ground, ki la jam sha kaba kut ha kaba ka kynhun Nongrah SC bad ka Pohkseh SC ki la khur namjop.
Haba phai sha ka jingïakhun kaba la sdang ha ka por 11:30 baje mynstep, ka Nongrah SC ka la pynjemkhnap ïa ka Umphrup SC da 4-1 kol.
Ka Nongrah SC ka la ïoh ban lamkhmat nyngkong tang hadien 6 minit ba la ïaid ka por lyngba u Dawandappura Pathaw nangta bud sa ka kol na u Kerionald Pyngrope ha ka minit ba 10, kaba la pynlong ïa ka kynhun ban lamkhmat da ar kol ha ka kylla step.
Hadien ba la jam sha ka kylla kaba ar, na ka liang jong ka Umphrup SC ka la pyrshang ban wanphai bad ïoh pynphai shi kol na u Luckystar Lyngshing ha ka 66 minit, hynrei u Dawandappura Pathaw u la nangpynskhem ïa ka Nongrah SC ban lamkhmat da lai kol ha ka minit ba 79 shuwa ba u Sondingroy Rngaid un thep ïa ka kol kaba khadduh ha ka 84 minit.
Haba phai pat sha ka jingïakhun kaba ar kaba la sdang ha ka por 2:30 baje nohphaisngi, ka Lumshyiap SC ka la shahrem salit da 1 kol ha ka Pohkseh SC. Kane ka shi kol la thep da u Hilford Lyngkhoi ha ka 56 minit.
Mynta ka sngi kin don ar tylli ki jingïakhun jong kane ka lympung SSA 2nd DIVISION Football League 2023 ha SSA Ground, ka jingïalehkai kaba nyngkong kan long hapdeng ka Smit SC pyrshah ïa ka Laitkyrhong SC por 11:30 baje mynstep bud sa kaba ar ha ka por 2:30 nohphaisngi hapdeng ka Marbisu SC pyrshah ïa ka Nongkrem SC.
