Nongpoh, Nailar 12: Namar ka jingeh jong ka shnong Umpathaw ha Ri-Bhoi ka bym don wat tang ka iing dorbar kaba paka ban pynlong ïaki jingïalang bad kiwei kiwei ki jingdonkam jong ka shnong ka thaw, u MLA ka Nongpoh u Bah Mayral Born Syiem mynta ka sngi u la leit ban aiti syndon da ka work order ban tei ïaka iing dorbar haka shnong Umpathaw naka bynta ka jingdonkam bad ka jingbit jingbiang jong ki paidbah.
Ïa katei ka iing Dorbar la mang lyngba ka skhim SRWP haka jinglut kaba T.2.50 lakh bad ha katei ka jingaiti ïaka work order la sakhi ruh da ka jingdonlang ki nongïalam shnong, ki longkmie longkpa bad ki khun samla jong ka shnong.
U Bah Mayral Born Syiem haba kren ha katei ka sngi u la pynpaw ka jingsngewkmen kaba khraw hadien bala ioh ban pynmang skhim naka bynta ban tei ïaka iing dorbar ha katei ka shnong kabym don wat tang ka iing dorbar kaba paka mynta la bun snem naka bynta ban pyntyllun ïaki kam ki jam jong ka shnong.
