Nongpoh, Ïaiong 28: Ban khanglad ïaka jingpynthud haka leit ka wan jong ki paidbah bad kumjuh ruh ka jingsahkut jong ki nala um, u District Magistrate ka Ri-Bhoi District u la pynjari syndon da ka kyndon aiñ 144 CrPC pyrshah ïa kino kino ki paidbah, ki kompani lane ki briew shimet ban pynhap shyiap, ki maw bad ki tiar shna ïing (Building Materials) ha rurud surok ha Ri-Bhoi District, katkum ka Construction and Demolition Waste Management Rule 2016, Environment Protection Act 1986 jong ka Ministry of Environment, Forest and Climate Change.
Ïa katei ka hukum la pynmih ban nym pynthud ïaki paidbah haka leit ka wan bad kumjuh ruh ba ki nala um kin nym shah ktah bad sahkut. La pyntip ba katei ka kyndon aiñ kan sdang treikam naduh bala pynmih ïa kane ka hukum bad kino kino kiba leh pyrshah kin shah pynshitom katkum ki kyndon aiñ.
