Leit kynduh DMHO ka HITO ba aiti ka sorkar ïa ki 15 tylli ki Sub center ban pynïaid da ka kompani shimet

Nongpoh, Ïaïong 27: Namar ka jingbym sngew ïahap halor ka jingaiti ka sorkar jylla ïaki 15 tylli ki Sub-Center ha Ri-Bhoi sha ka HANS Foundation, Ka Hynniewtrep Integrated Territorial Organization, HITO Ri-Bhoi District ka la leit ban ïakynduh syndon ïa u Dr. P Kharnarry, DMHO ka Ri-Bhoi District ban ïakren halor katei ka jingaiti noh ka sorkar ïaki Sub-Center ban peit ban khmih noh da ka kompani shimet.
Haba kren sha ki lad pathai khubor hadien ka jingïakynduh bad u DMHO, u Bah Apborlang Nongrum, Working President ka HITO, Ri-Bhoi haka jingïadon ryngkat lang da u Keny Nongrum Secretary lem bad ki dkhot, u la pynpaw ïaka jingbynñiaw halor ka jingaiti ka sorkar jylla ïaki 15 tylli ki sub-center sha ka HANS Foundation ha kaba ka sorkar ka thmu ban die lut ïaki tnad sorkar ban pynïaid da ki kompani shimet khlem ka jingtip ki paidbah, u la ong ruh ha jinngshisha ha shwa ba la sorkar kan aiti ïa ki Sub-center ki ladei ban pynbna shwa sha ki paidbah, hynrei mynta kam shym long kumta ka sorkar ka la shu aiti sop sop sha ka HANS Foundation ïa kitei ki 15 tylli ki sub-center.
U bah Apborlang Nongrum u la ong ruh ba hadien ba la dep ban ïakren bad u DMHO ka Ri-Bhoi, u DMHO u la pynshai sha ki ba ka jingaiti ïaki Sub-Center sha kane ka Foundation, ka jingmyntoi kan don ïaki paidbah hakaba ïadei bad ka ïohkam ïoh jam bad kiwei kiwei, hynrei ka ba pynbynñiaw ka long ba balei ka sorkar kam shym la ai ïaka jingpyntip hashwa ba kan leh ïa kane ka kam.
Hakaba ïadei bad ka jingshimti noh daka HANS Foundation ïaki Sub-Center, ka seng HITO kan sa bishar bha halor ka MoU kaba la ïa soi hapdeng jong ki bad ka sorkar bad kan sa shong ban pyrkhat hashwa ba kan shim ïa kino kino ki sien jam.