Ban kyntiew ïaki mar rep tynrai, pynlong ka TRIFED bad ka MBDU ïaka Tribal Artisans Mela kaba 2 sngi ha Nongpoh

Nongpoh, Ïaiong 28: Kum shibynta ban kyntiew ïa ki mar rep, ki jaiñ tynrai bad ki jingthaiñ kiba la pynwan dur daki kti kiba mih naka thaiñ Ri-Bhoi District, ka Tribal Cooperative Marketing Development Federation of India Limited (TRIFED), Ministry of Tribal Affairs jong ka sorkar India haka jingïatrei ryngkat bad ka Meghalaya Basin Development Unit, Ri-Bhoi District mynta ka sngi ka la ïoh ban pynlong ïaka Tribal Artisans Mela ka ban neh 2 sngi lynter ba la pynlong ha District Library Hall, Nongpoh.
Haba kren sha ki lad pathai khubor u Om Prakash, Deputy Manager ka TRIFED, Ministry of Tribal Affairs u la ong ba ka jingthmu jong kane Mela ka long ban ailad ïaki nongshna jingshna bad ki nongpynmih ïaki mar rep ba kin ïoh ïaka lad ban pynpaw pyrthei ïaki mar ki mata jong ki bad na ka liang ka TRIFED kan ïarap ban rah ïaki mar rep ban pynsaphriang shabar ka jylla.
Shuh shuh u la ong lyngba Kane ka Tribal Artisans Mela kin ïoh ruh ban jied ïaki katto katne ngut ki nongwan ïashim bynta bad ban ïarap ïaki ban pyndie ïaki mar jong ki sha bar jong ka jylla, bad u la ong ruh ïa kito ki bym shah jied naka liang ka TRIFED Tribal Affairs kin ai ïaki jinghikai sha ki ba kumno ba kin nang pyntbit shuh shuh ban sei ïaki mar rep jong ki haka rukom kaba kham itynnad.
Hakane ka sngi la wan ban ïashim bynta daki katto katne ngut ki nongthaiñ jaiñ bad ki nongshna jingshna naka them Ri-Bhoi hakaba lawan ruh ban ïadonlang daka Om Prakash, Deputy Manager ka TRIFED Ministry of Tribal Affairs, u Ekbal Husaiñ, Senior Program Executive jong ka Trifed Regional Office North East & NHHDC, u Bah Marlamkupar Kharmudai, District Project Manager ka MBDU bad kiwei kiwei.