Dei tang ka Voice of the People Party kaba dang don ka jingkyrmen ïa ka jaidbynriew: Ardent Basaïawmoit

Mawkyrwat, Ïaïong, 28: U bah Ardent Miller Basaiawmoit u MLA jong ka Voice of the People Party (VPP) na ka Nongkrem Constituency mynta ka sngi u la wan hiar sha Mawkyrwat ban wan ban pynshai paidbah ïa ki mat bad ki nongrim trei kam jong ka VPP bad ba ki paidbah kin sngewthuh ha shwa ba kin pynïasoh ïa lade bad kane ka Party VPP ha kaba ïa ka jingïalang la pynlong hapoh ka Dorbar Hall Mawkyrwat, South West Khasi Hills District.
Ka jingthmu jong ka Voice of the People Party (VPP) ba ka hiar ha ka thaiñ Mawkyrwat ka long ban pynrung kyrteng ïa ki briew ha ka party bad ruh ka jingthmu ba kongsan ruh ka long ban sei ïa la ki jong ki kyrtong ha baroh ki konstitwensi kiba hap hapoh jong ka KHADC bad JHADC na ka bynta ka elekshon MDC ha u snem ban wan bad ruh ban ïoh ban pynïeng ïa u kyrtong na ka bynta ka MP Election napoh ka jylla Meghalaya.
Haba kren bad pynshai ha ka jingïalang, u bah Ardent Miller Basaiawmoit u la ïoh ban pynshai paidbah ïa ki mat bad ki nongrim trei kam jong ka Voice of the People Party (VPP) khnang ba ki paidbah kin sngewthuh shai ïa ki nongrim kiba skhem ha shwa ba kin pynïasoh ïa lade bad ban long ki dkhot ba pura jong ka Voice of the People Party (VPP).
Ha kajuh ka por u la ong ruh ba ka pyrthei mynta ka khih win ha kine ki sngi ba la jan baroh ka Ri India ba ki briew ki la ithuh bad tip lut ïa kane ka Voice of the People Party (VPP) namar ba hadien ba u lad jong ka jylla u la kren da ka ktien Hindi ha ka por ba long Dorbar ha Assembly ïa kaba na ka liang ka u bah Ardent Miller Basaiawmoit ha ryngkat bad kiwei de ki MLA jong ka VPP ki la kyntait ban pyrshah ïa ka jingkren da ka ktien Hindi da kaba ki mih noh shabar katba ka Dorbar ka dang ïaid shakhmat.
U bah Ardent Miller Basaiawmoit u la ong, “Ka jingjop jong ki saw ngut ki MLA na ka Voice of the People Party (VPP) ka dei ka jubab jong U Blei ba ka dang don ka jingkyrmen ïa ka Ri bad ka Jaidbynriew bad ka pynsyiad mynsiem ïa kiba bun balang hapoh ka ka Ri khasi”.
Shuh shuh u la bynrap ba ka jingjop jong ki saw ngut ka dei ruh ka jingjop ïa ki saw bynta, “ka jingjop ïa ka bor jong ka pisa, ka jingsam kyiad ki jingkhawai ha ka por elekshon kaba ar ka jingithuh ïa ka party kum ka State Party na ka Election Commission jong ka ri India ka jingjop kaba lai ba baroh ki briew ki la ïa kwah ban peh prah hajan baroh ki Konstitwensi bad ka jingjop kaba saw ka long ba ka VPP kan shim noh ïa ka jaka jong ki seng Riewlum namarba baroh ki seng Riewlum ha kane ka jylla ki dei tang ki seng ha ka por elekshon bad kim don ka nongrim kaba skhem”, u Bah Ardent Miller Basaiawmoit.
Ha kawei pat ka bynta, u la ong ruh ba kaei ka daw ba u mih noh na ka UDP bad na ka HSPDP ha kine snem ba la dep ban thaw noh na kane ka Party thymmai ka VPP namar ka dei lyngba ki nongrim da kaba kynnoh ba kine ki party Riewlum hapoh ka jylla Meghalaya kim shym la don ka nongrim kaba biang ban ïada na ka bynta ka lawei ka jaidbynriew, namarkata, ïa ka VPP la seng ha ka nongrim ban don jingkyrmen ïa ka lawei ka jaidbynriew.
Ha ka jingkren jong u bah Adelbert Nongrum, MLA ka North Shillong pat u la ong ba dei tang kane ka Voice of the People Party (VPP) kaba dang don ka jingkyrmen ïa ka jaidbynriew, bad shibun ki party Riewlum ki la ïaid lyngba ha ki 50 snem naduh ba ngi la ïoh la ka jong ka jylla ka Meghalaya hynrei haduh kine ki sngi ngim shem la don la u jong u pud u sam uba biang. Namarkata, shibun ngi la duh noh ïa ka burom ïa ka spah ka phew bad sa tad katno ka jaidbynriew ruh ka duhnoh, namarkata, da ka jingdon ka Party VPP ka dei ka jubab kaba U Blei ba U dang ieid ïa ka Ri khasi bad ngi dang don ka jingkyrmen lyngba kane ka Party VPP ha ki sngi ki snem ki ban sa wan.
Ïa ka jingïalang paidbah la pynïaid da u bah Kospar Ryntathiang lyngba da ka jingïadonlang u bah Brightstar Marbaniang, ki MLA na ka Voice of the People Party (VPP), ki ‘riew rangbah, ki longkmie, ki samla bad ki paidbah na ka thaiñ Mawkyrwat kiba la wan sngap ïa ki jingpynshai na ki nongïalam jong ka Voice of the People Party (VPP).