Nongstoiñ, Ïaiong 28: Ka Northeast Institute of Professional Studies (NeIPS) Nongstoiñ, kum ka shlem jingkyrkhu, ka la ïai bteng ïa ka jingshakri jong ka man ka por bad ka la long ruh ka jingkyrmen sha ki samla ka thaiñ Nongstoiñ baroh kawei, hapdeng kane ka juk jong ka jingkyrduh kam kyrduh jam kaba jur bha.
U Mawphor ha ka jingbuddien ïa kane ka jaka ai jinghikai, la lap ba bun na ki rangbah, longkmie, ki samla pule khamtam kiba la duh jingkyrmen watla ki la pyndep ïa ki jingpule kiba kham hajrong, namar kim pat ïoh kam. Hynrei kane ka jaka pule ka la kyrshan ïa kiba bun ki samla khamtam bad ki longkmie ban seng kam la jong.
Haba ïakren bad u Bah Michael Thongni, Chief Executive Officer NeIPS, u la pynpaw ba ka long kaba khia shibun eh ban trei ïa kane ka kam shakri paidbah. Bunsien ka pynduh thiah pynduh dem ïa u, hynrei u sngew kmen pat ban ïohi ba bun ki kmie ki kpa bad ki samla ki ïoh jingkyrmen na ki lad jingpule bapher bapher, kiba don ha kane ka Institute.
Haba ïathuh ïa ka jingïaid lynti jong ka NeIPS, u la ong ruh, “Ki la don katto katne ki samla kiba la ngop ha ki kam sniew, hynrei haba ki wan ban wad lynti biang ha kane ka jaka, mynta ki la lah ban leh kham bha ban ïa kiwei ruh” bad bynrap, “Kane ka jaka pule jong ngi, ka don ka thong kaba kham kyrpang eh na ka bynta ki khun samla kiba wan na ki longïing ba duk ba kyrduh, hynrei kiba angnud ban trei ïa ka kam ban im ja im jhur”.
Haba kylli kumno ka NeIPS ka ai jingkyrshan hadien ka training ïa ki samla kiba wan na ka longïing ba duk ki bym don pisa ban sengkam la jong. Na ka liang u Bah Michael u la ong “Ka NeIPS ka don ïa ka kynhun kaba kyrpang halor kane bad ka jingkyrshan ka dei lai bnai da ka jinghikai kaba kyrpang kumno ban pynwan dur bad pynurlong ïa kata”.
“Ngi don ïa ka sorkar kaba sbun ha kaba ka la pynmih shi bun ki kynja scheme ban ai ïa ka jingkyrshan sha ki khun samla kiba kwah ban seng kam la jong. Hynrei kaba sngewsih ka dei namar ba bun na ki samla, kim pat long kiba la pynkhreh ban ïoh ïa kita ki scheme. Kine ki long kum ka PMEGP, NHFDC, SHG schemes bad kiwei de”.
“Kumta nga don ban kyntu ïa ki samla ba ki dei ban wan sha khmat ban ïoh ïa ka jingshah hikai, namar kine ki training ki long kiba shu ïoh ei bad ka pynmyntoi ïa ki samla haba bun ki liang ynda ki la pyndep ïa ka jingshah hikai. Lada don ka jingnang jingtip ban shna kam, ka don ruh ka jingsuk ha ka mynsiem, namar ki lad ki lynti na ka sorkar ruh lah ban ïoh bad kane keiñ ka pynsngew skhem ïa ka ïing ka sem bad wat ha ka imlang sahlang”
Haba ïa kren bad u Lamshai Kharkongor, uwei na ki khynnah u ba la ïoh ïa ka jinghikai na kane ka shlem, u la pynpaw ïa ka jingsngewnguh jong u ïa ka Skul bad ki Nonghikai kiba la trei shitom ban ai ïa kaba bha tam.
“Hangne ngi ïoh ïa ka jinghikai kumno ban seng kam la jong bad kumno ban pyndonkam ïa ka pisa kaba mih na kaba ngi seng ban pynheh shuh shuh. Ka rukom hikai ka pynlong ruh ïa ngi ban shemphang bad sngew shlur ban sdang, namar kane ka skul ka buh da ki Nonghikai kiba kyrpang ban buddien bad ban kyrshan ïa ngi ba ngin ym bakla ban pynïaid ïa ka kam bad kane ka jingkyrshan ka dei haduh 6 bnai”, u la ong.
“Kaba kongsan eh ka long, haba ngi thmu ïa ka kam ban ieng ha la ki jong ki kjat ka dei ba ngim dei ban lehraiñ ban mih shakhmat. Namar kine ki trei jait training, kitei ïa ka lawei ka jong ngi kumjuh ruh ïa ka jylla hi baroh kawei. Nalor nangta, ka NeIPS ka ai ïa ki jait training kiba dei thik ïa ki jingdonkam jong ka thaiñ, kum ka jingthung tit, jingsuh jaiñ bad shna mobile. Nalor nangta ym donkam siew pisa ei ei, namar ki traiñing baroh ki dei kiba ngi shu ïoh ei”, ong u samla Lamshai.
“Nga sngew ban kyntu lem ruh sha ki para samla, ba kim dei ban ngop ha ki kam sniew ki ban pynjem rngiew ïalade ha ki kam kiba jaboh. Hynrei ban wan shakhmat bad pyntbit ïalade ha kane ka shlem ai jinghikai. Namar ka lad ka plie barabor lada ki samla ki don ka thong bad haba ki angnud ïa ka bha bad sngewthuh ba ka lashai ka ap ïa ki khun samla”, u la pynkut.
