Mana u DM ka Ri Bhoi ban pynthud ïa ka jingpyntrei ïa ka surok Western Shillong By-pass

Nongpoh, K’lyngkot 28: Ban ïaid beit ka jingpyntrei ïa ka surok Western Shillong By-pass, u District Magistrate ka Ri Bhoi kumba la pynkup bor katkum ka section 163 jong ka Bharatiya Nagarik Suraksha Sanhita, 2023, ha ka sngi Baar u la pynjari da ka kyndon aiñ ban khang pyrshah ïa kino kino ki trai jaka ne ki riewshimet kiba thmu ban pynthud ha ka jingpyntrei ïa ka surok Shillong Western By-pass.
Katkum ka kyrwoh, la pyntip ba kane ka jingpynmih hukum ne pynjari ïa ka kyndon aiñ da u District Magistrate ka Ri Bhoi, ka long katkum ka kaiphod ba la ïoh pdiang na ka NHIDCL- PMU Mylliem East Khasi Hills District, ha kaba la mih ka jingkynnoh ba la don ki trai jaka, kiba thmu ban pynthud ïa ka jingpyntrei ïa ka surok Shillong Western By-pass ha ki jaka ba hap ha ki katto katne ki bynta jong ka shnong ha katei ka thaiñ.
U District Magistrate u la pynpaw shai kumba long haduh kine ki sngi, ïa ka bai lutksan jong ki jaka ba ïaid ka surok Shillong Western By-pass ladep ban siew lut da ka Sorkar bad ïa ki jaka la long trai da ka Sorkar bad kum ki trai jaka kim donhok shuh ban dang tuklar ne pynthud ïa ki jingpyntreikam ïa ka surok, namarba ka Sorkar ka ladep ban siew lut ïa ka bailutksan.
U District Magistrate u maham tyngeh ïa kino kino ki trai jaka ne ki riewpaidbah ba kim dei ban pynthud ïa ki jingpyntreikam ïa ka surok bad kino kino kiba ïaleh pyrshah kin shah pynshitom ha ki kyndon ain jong ka Section 223 ka Bharatiya Nyaya Sanhita 2023.