Pyllait ka BJP ïa ka Manifesto ki kam kaba don bun ki jingkular

0

Shillong K’ Lyngkot, 28: Ka Bharatiya Janata Party-Meghalaya Pradesh, ha ka sngi Nyngkong, ka la pyllait paidbah ïa ka manifesto jong ka elekshon KHADC bad JHADC, ka ban long la 21 tarik u Rymphang mynta u snem.
La ong ba katkum kane ka manifesto ba la pyllait da u President ka Party Rikman G. Momin, ka BJP ka la kular ba lada ka wan ha ka bor, kan pynïoh noh da ka tulop ïa ki khlieh nongsynshar kynthup ki Sordar bad ki Rangbah Shnong.
Ha ka Manifesto ka la kular ruh ban sam jingïarap pisa ba T.2000 shibnai ïa kiba bylla sngi kum ki nongtrei kynta, nongñiah taxi, kiba khlad lok, ki longkmie ba kyrshan dalade, ki kam ba pyntreikam da ki dorbar shnong.
Ka la ong ruh ba namar ka jinghiar palat ka khajna na ka kam khaïi dewïong, ka BJP ka la kular ba kan sdang noh ïa ka kam tih dewïong katkum ka jingbthah jong ka Ïingkashari Supreme Court ban pynkiew ïa ka jingïohnong jong ka Council.
“Sarong ïa la ka jong kan long kawei na ki lad ban kyntiew ïa ka kam jingohkai bad ban kyntiew ïa ka kolshor jong ka jylla,” ka la ong ba ka dei kawei na ki mat elekshon jong ka BJP nalor ka jingpynkhlaiñ ïa ka jingai jingsumar dawai kynbat ha ryngkat ka jingïatreilang bad ka AYUSH Ministry.
Haba kular ban thung ïa ka Committee ka ban khmih bniah ïa ka jingpyntreikam ïa ki skhim paidbah hapoh ki District Council, ka BJP ka la kular da kaba ong, “Ka District Council kan pynmih ïa ka tnad ka ban khmih bniah halor ka jingbei tyngka na ka bynta ban sengkam ki samla trai ri ba la nang la stad ha ryngkat ka jingïatreilang bad ki Syiem, ki Dalloi bad ki Dorbar Shnong.
Halor ka jingpynkylla ïa ka Sixth Schedule, ka BJP ka la pynpaw ba kan buddien ïa ka jingpynkylla khnang ban pynkiew ïa ki MDC ba shu thung hapoh 6 bnai bad ka Party ka dawa ba uwei u MDC ba shu thung u dei ban dei uwei u Syiem ha KHADC bad uwei u Dalloi ha JHADC.
Ka BJP ka la kular ruh ba kan wanrah da ki buit thymmai ban pynseisoh ïa ki jaboh jabaiñ kiba mih na man ki Hima bad Elaka bad ban ai jingïarap beit beit na ka Council ban thied ïa ki kor ki bor ban pynïakhlad ïa ki ñiut.
Ka BJP ka la kular ruh ba kan wanrah ïa ka rukom thungkam kaba khuid hapoh ki District Council.

Leave A Reply

Your email address will not be published.