Pynkhreh shaid shaid ka West Khasi Hills ïa ka elekshon sha KHADC

Nongstoiñ, K’lyngkot 28: Ka jingïalang ha kaba ïadei bad ka jingpynmih ïa ki Final Electoral Rolls na ka bynta ka elekshon KHADC 2025, ka la long ha ka 27 tarik u Kyllalyngkot 2025 ha Conference Hall Deputy Commissioner Office Nongstoiñ.
La pynïaid ïa kane ka jingïalang da u bah Garod L.S.N. Dykes IAS, Deputy Commissioner (EL), West Khasi Hills District, ha ka jingïadonlang ki ophisar ba dei peit ïa ka jingpynrung kyrteng elekshon, ki Assistant Ophisar ba dei peit ïa ka jingpynrung kyrteng elekshon, ki nongmihkhmat na ki seng saiñ pyrthei bad ki dkhot jong ki nongthoh khubor.
U Chairman u ba la pdiang sngewbha ïa baroh kiba la wan, u la batai lyngkot ïa ki halor ka jinglong jingman jong ka rukom jied nongmihkhmat. U la pyntip sha baroh ki seng saiñ pyrthei kiba don lang, ba ka tnad District Council Affairs jong ka Sorkar Meghalaya, ha ka 27 tarik Kyllalyngkot 2025 ka la pynbna paidbah ba ka sngi thep vote sha ka elekshon KHADC bad JHADC 2025 kan dei ha ka 21 tarik U Rymphnag 2025.
Kumta, ka Model Code of Conduct (MCC) kan treikam noh mardor naduh ba la pynbna ïa ka elekshon. Ki electoral roll kiba la mynjur da u Lat ka Jylla, yn pyndonkam na ka bynta ban pynïaid ïa ka elekshon. La kyntu ïa baroh ki seng saiñ pyrthei ba kin bud ryntih ïa ka MCC, khnang ba kane ka elekshon MDC kan ïaid beit ïaid ryntih hapoh West Khasi Hills, District.
Ha kane ka jingïalang, la ïakren ïa ki katto katne ki mat ba kongsan, kynthup ïa ki Polling Station bad ki Auxiliary Polling Station. Ïa ka thup jong ki jaka thep vote ba la mynjur, ryngkat bad hynriew (6) tylli ki jaka thep vote ba ïarap.
Ïa ka por ban thep kyrteng, ka jingbishar bniah, bad ban weng kyrteng yn pynbeit da ka tnad District Council Affairs, Shillong. Ka jaka ban thep kyrteng kan long ha ki kamra jong ki Returning Officer bapher bapher.
Katkum ka tnad District Council Affairs, Shillong (shithi No. DCA.62/2024/Pt.I/4, ba la thoh ha ka 16 tarik u Kyllalyngkot 2025, ba ïa ka pisa ba la buh ban thep kyrteng ka long ï3,000 (lai hajar tyngka). Ka jingpynlut kaba heh tam na ka bynta ki kyrtong ka long ï5,00,000/- (San Lak Tygka).
La bthah ïa ki seng saiñ pyrthei ba kin leit sha ka Permission Cell kaba don ha ophis jong u Deputy Commissioner Nongstoiñ, na ka bynta ban ïoh ïa ki jingbit lada ki kwah pynlong ïa kino kino ki jingïalang, ki rally bad kiwei kiwei ki jingïalang kiba ïadei bad ka elekshon.
La dep ruh ban pynkhreh ïa ka fixed rate chart na ka bynta ki tiar ban pyndonkam da ki seng saiñ pyrthei ha ka por elekshon. Kane ka chart ka thmu ban pynthikna ïa ka jinglong mar ryngkat ha ka jinglut jingsep kaba ïadei bad ka jingïalap elekshon.
Shuh shuh, u bah Garod L.S.N. Dykes IAS Deputy Commissioner (EL), u la pyntip sha baroh ki sengbhalang ba ka tarik ba khatduh ban thep kyrteng la buh ha ka 3 tarik Rymphang 2025 (sngi Nyngkong) shwa ka por 3:00 P.M. Ka jingbishar bniah ïa ki kot ki sla thep kyrteng kan long ha ka 3 tarik u Rymphang 2025 (sngi Nyngkong) hadien ka por 3:00 P.M.
Ka tarik ba khatduh ban weng noh ïa ki kot thep kyrteng ka long ha ka 4 tarik u Rymphang 2025 (sngi Ba ar). Ka jingpynkut bad jingpynmih ïa ki kyrteng kiba biang, ryngkat bad ka jingai ïa ki shap kan long ha ka 6 tarik u Rymphang 2025 (Sngi Palei).
Ka jingthep vote kan long ha ka 21 tarik u Rymphang 2025. (Sngi Thohdieng), kaba sdang naduh ka por 7:00 baje mynstep bad pynkut ha ka por 4:00 janmiet. Ka jingñiew ïa ki vote kan long ha ka 24 tarik u Rymphang 2025 (sngi Nyngkong).
La ïoh ruh ban sam ïa ki thup kyrteng jong ki nongthep vote ne ka Final Electoral Rolls sha baroh ki political party kiba la wan sha katei ka jingïalang. Na ka bynta ki jingtip bad jingpynshai ba kham bniah, la kyntu ïa ki seng saiñ pyrthei bad ïa ki paidbah ba kin leit mih sha ka Ophis jong u Deputy Commissioner, West Khasi Hills District.