Shillong, Lber 11: Ka seng Hynñiewtrep Youth Council (HYC) ha ka sngi Nyngkong, kala maham jur ïa ka Northeast Sunshine Trust (India) bad kiwei kiwei ki Agent Sorkar ba kim bit da lei lei ruh ban khyllie biang ïa ka kitab tih Uranium hapoh ka Jylla.
“Ka HYC: CEC lyngba kane ka kyrwoh ka kwah ban phah ka khubor kaba shai sha baroh kito ki Agent jong ka Sorkar India ne ka Sorkar Jylla ba kidei ban sangeh shi syndon ia kino kino ki jingthmu ban pyrkhat ne mutdur ba kin khlong lane tih ïa u Uranium na ka Bri U Hynñiewtrep,” ong u President ka HYC u Bah Roykupar Synrem.
Une u Nongïalam ka HYC ula ong ba ka HYC ka ïeng ha ka nongrim kaba skhem bad ka jutang ba la khlei ba kan ym shah ban khlong ïa une u marpoh khyndew na kane ka Ri.
“Kumba ngi lahdep ban kren naduh ki sngi bad ki snem kiba lahdep, haduh mynta ka kynti ruh ngi ïaineh skhem ba ngi pyrshah jur ïa kano kano ka jingpyrshang ban khyllie biang ïa ka kitab tih Uranium napoh kane ka Ri ka jong ngi,” ula ong.
“Ngi kren ruh da kaba shai ba kum ka Seng bad ki dkhot ki jong ka baroh, ngi long kiba lah kloi ban ïakhun da kaba kano kano ruh ka lynti ban pynthikna ba ka Sorkar India ne ka Sorkar Jylla kan nym dei ban ïohlad ban pyrshang pynim biang ïa kane ka mat namar kan bha ba ngin ïakhun mynta ban ïa kaba ieh ban ïap bad duhjait ka Jaitbynriew lyngba kane ka bih jong u Uranium,” ula bynrap.
Ha kajuh ka por, ka HYC ka pynrem jur bad maham tyngeh ruh ïa ka Founder Trustee bad Chairperson ka NEST (India) kong Elizabeth Nongbri bad kiwei kiwei ba kim dei dei ban pyrshang mushlia laplah ïa kane ka kam ïap kam im jong ka Jaitbynriew.
“Lehse kane ka briew ka kwah ban sngewthuh (testing the waters) ïa ka sur jong ki khun samla bad ki dkhot ka Jaitbynriew bad hadien pat ka pyrshang ban len noh ïa kaei kaba ka lah dep ban thoh. To tip tang kawei ba kum ki Sengbhalang ne ki kynhun bapher bapher, ngi lah ban don ïa shibun ki jingïapher ha ki lama ba ngi don, hynrei ngi long kawei ka jingmut bad ka jingthmu bad, “kata ka long ban ïada bad pynneh pynsah bad khamtam eh ban ïaleh khlem kynrandien na bynta la ka Jaitbynriew,” ula ong.
