Shillong, Lber 11: U Personal Security Officer (PSO) ka Hynniewtrep National Liberation Council (HNLC) uba la shah kem u bah Storgy Lyngdoh, ula hap ban shong along ne ïoh judicial custody sa 14 sngi.
U Bah Storgy uba shah kem na Mawlynrei ha ka 2 tarik Lber, la ïalam tian bishar biang ïa u mynta ka Lah Sngi U Blei hakhmat ka ïing Bishar hadien bala kut ka jingshah set ha byndi ki pulit kaba long 10 sngi.
Ki Pulit ki ïathuh ba u Bah Storgy ula sam shithi dawa pisa na ka bynta ka HNLC kaba la wanrah ka jingrit mynsiem bad jingsheptieng jong kiba bun ki nongkhaïi ha nongbah Shillong.
U Bah Storfy u dei u dkhot ka HNLC uba ïajan bha bad u Deputy Commander-in-Chief ka HNLC. U dei u PSO jong u A Hazarika ba khot sin u Manbhalang Jyrwa, uba dei u Vice Chairman ka HNLC uba la ïehnohkam hapdeng ka jingïakren ïasuk.
