Shillong, Lber 11: Ka North East Sunshine Trust (India) ka la hap ban pan map na ka seng Khasi Students Union (KSU) halor ka shithi ba ka thoh sha u Myntri Khynnah ka Department of Atomic Energy, (kaba ka kam ba kam pat phah) ba pynpaw ïa ka jingkwah ban tih noh ïa u Uranium hapoh ka Jylla.
Ka Nongseng bad Chairperson ka NEST (India) ka kong Elizabeth Nongbri, ka la phah da ka shithi sha u President ka KSU Bah Lambokstar Marngar ban pan map bad ba la pynsangeh noh ïa ka shithi ba ïadei bad ka jingkwah tih ïa u Uranium ha Jylla Meghalaya.
Shithi pan map
“Ngi babe jur halor ki synboh ba don ha kane ka shithi kaba la pyllait paidbah lyngba ki rynsan social media da ki briew ki bym lah ban tip. Ka seng jong ngi kam don jingmut lane pynshlur ne kyrshan ïa kum kine ki project” kala ong ha ka shithi.
“La pynthikna ba kane ka shithi kaba dang dei tang ka draft, ym pat phah satia sha uba la jer kyrteng” kala bynrap.
