Lum ka Congress ïa ki nongkitkam bad nongkyrshan shwa ka elekshon MP

Nongstoiñ, Lber 11: U kyrtong MP na Shillong Seat u Bah Vincent Pala ha ka sngi nyngkong jong ka taiew, u la lum la lang ïa ki nongkitkam bad nongkyrshan ka party Congress na West Khasi Hills na ka bynta ban ïa syllok shwa ban leit sha ka lympung ïalap elekshon sha ki bynta bapher bapher ka District bad ka Jylla.
Ha ka jingïalang kaba la long ha Congress Bhavan Nongstoiñ, la donlang ruh u Bah Gabriel Wahlang MLA Nongstoiñ, MLA Mawhati Bah Charles Marngar, ki nongkitkam ka seng Congress na West Khasi Hills, kata naduh ka Mahila, Youth Congress bad ki nongkyrshan, ki la don shim bynta ban ïakren halor ki kam kiba ïa dei bad ka jingpynkhreh ïa ka elekshon MP.
Na ka liang u Bah Gabriel Wahlang u la pynshai halor ka jingmut jong kane ka jingïalang, da kaba u la ong ba kane ka dei ka lad kaba biang eh ba kum ki nongkitkam bad nongkyrshan ka party kin ïoh ban ïakren markhmat bad u kyrtong MP shwa ban don ki jingïalang paidbah ha kylleng ki jaka. Namar bunsien ynda la pynlong jingïalang paidbah, bun na ki nongkitkam kim shym ïoh lad ban ïakynduh ne kren markhmat bad u kyrtong.
U Bah Charles Marngar u la ong ba dei ka seng Congress kaba la ai ïa ka Jylla Meghalaya naduh u snem 1972 ha ka por jong ka (L) Indira Gandhi ha ka por ba ka long Prime Minister, ka la wan hi dalade ha madan Nongthymmai Shillong ban ai ïa ka Jylla.
“Ngim dei ban klet ba dei ka seng Congress kaba la ai ha ngi ïa ki jinglaitluid kiba bun, naduh ka riam ka beit, ka ktien ka thylliej, riti dustur bad ka niam ka rukom. Lada ym don ka seng Congress wat ka District Council ruh ngim don ban ïada ïa ngi. Shibun bah ki kam ba ka seng Congress ka leh ïa kaba ngim lah shuh ban siew kylliang”, ong u Bah Charles Marngar.
“Lada ngi kren ïa ki kam pynroi ruh naduh ki surok bah National Highway, ka NEHU, ka NEIGRIHMS, ka skhim 100 sngi, ka smart card bad lada ngi kynmaw ba wat ki mar bam mar dih ruh ha ka por ka sen Congress ka long kaba bit kaba biang. Kine ki long katto katne kiba ka seng Congress ka leh na ka bynta ki paidbah”, u la ong.
U la ong ruh, “I Ma Vincent Pala I la long MP 15 snem hynrei bun bah ki jingkynthoh ki jingkylli pyrshah ïa I. Mano ban pyrkhat ba ka lyngkor ban kit ïa ki 36 tylli ki Constituency ka Shillong Parliamentary seat kam dei satia kaba suk. Ngi ki MLA tang kawei ka Constituency ngi ktha khlieh namar kam dei kaba suk. Hynrei ïa I Bah Pala bun ki kdew kti bad kylli ban ong hato I la leh aiu, ki klet pat ba u dei u MP u ba la ïoh ban kren bunsien tam hapoh Parliament napdeng ki MP na ka thaiñ shatei lam mihngi”.
U Ma Pala haba ai jingkren u la ong, “Ka nongrim jong kiwei kiwei hi khamtam ka BJP kumba phi la ïohi ka long ban pynpharia ïa ngi. Ha ki jaka ba don ki Muslim bad Hindu, pynïashrut ïa ki, ha ki jaka ba don tang Khristan ki pynïashrut ïa u Khasi bad Garo lane ïa ki Khristan bad ki bym long Khristan. Kane ka dei ka rukom treikam jong ki kumba la jia ha Manipur hapdeng ki Meitei bad Kuki”.
“Hapoh ka Jylla jong ngi ruh ka NPP ka la sdang pynpharia hapdeng u Khasi, Garo bad ki ba nabar bad khyndiat pa khyndiat kane ka rukom treikam jong ki ka ïaid napoh napoh hapoh ka jingïalam ka BJP”, u la ong bad bynrap, “Kane ka dei ka jingïapher hapdeng ka Congress bad ka BJP bad kiwei kiwei”.
“Ka VPP kum ka party thymmai ka long thik kum ka AAP hapoh India kaba shu kular ïa ka bneng ka khyndew bad ban ong ba ngi long kiba hok. Hynrei ynda la pynjop ïa ki tang mar shiteng ka samoi ki la don hapoh Jail, namar ki jingkular kim ïahap bad ka kam ba ki leh. Ban shu kular bad ban pynheh ka suk hynrei ban synshar pat kam dei satia kaba suk”, u la ong.
“Ka jingïapher hapdeng ka Congress bad kiwei ki party ka long ba kaei kaei kaba ngi kren ngi kular lyngba ki manifesto jong ngi, ngi leh ïa kata wat lada ngim lah ban leh 100 na ka 100 ruh. Katba ka BJP bad kiwei kiwei ki party pat ki shu pynbiej paitbah. Peit na ka NPP myn kane ka kular pynïoh kam 5 lak ngut bad pyllait dewiong. Hynrei haduh mynta la urlong ki jingkular. Ban shu kular por elekshon ka suk hynrei ban leh ta ka eh palat”.
“Ha ka Congress nalor ba ngi ïoh ki lad jingïarap bad ki kam pynroi, ngi donkam ban pyrkhat khamtam eh ïa ka shong suk shong saiñ jong ka ri bad ki jaidbynriew. Kata hi ka dei ka kam kaba kongsan eh hapoh ka ri ka jong ngi”.
“Peit aiu ka BJP ka leh, ka la pass ïa ka aiñ CAA haduh ba ki paidbah ki la pyrshah jur, pynban ka pass jubor. Ka UCC kaba ktah ïa ka riti dustur jong ngi, ïa ka hiar pateng jong ngi, ka shongkha shongman jong ngi, ka BJP ka thmu ban iuhroit. Lada phai ha baroh hi ki liang ngi ïakynduh jingeh bad ki jingeh ki ap hakhmat jong ngi. Dei tang ka Congress hi kaba ai ka jingshngaiñ bad ka jinghun sha baroh ki nongshong shnong hapoh ka ri”, u la ong.