Haduh mynta dang shah kem tang uwei ba donkti pynïap briew

Nongstoiñ, Lber 11: Ka synjuk ki nongñiah kali Tourist Taxi Nongstoiñ lane JAC Tourist Association ha ka janmiet sngi nyngkong, ka la pynlong ïa ka jingthang mombati ha jingkieng Nonbah bad dawa jur ïa ki bor jong ka aiñ ba ki dei ban leh ei ei noh ban ïohkem sa ïa kiwei pat kiba donktilang ha ka ban shim noh ïa ka jingim jong u (L) Macborn Bonnyson Kharbani.
Ki nongkren kiba la ai jingkren hadien ka jingthang mombati naduh ki sengbhalang bapher bapher, seng samla shnong, seng nongñiah kali bad kiwei, ki la pynpaw ïa ka jingdawa na ki bor ka aiñ ba ki dei ban shimkhia bad pynkloi ban ïoh kem ïa kiba dang phet rieh haduh mynta bad ban pynshitom ïa ki katkum ki kyndon jong ka aiñ.
Napdeng ki nongkren don kiba la pynpaw ba lada ka tnad pulit ka thong haduh shi lak tyngka ïa kiba ïoh jingtip ïa kiba pynbthei bom. Hato balei ki pynslem pat ban kem ïa ki nongpynïap briew. Don ruh kiba la ong ba dei ban leh ei ei ïa kiba donkti ban pynïap ïa utei u samla, lym kumta kim banse ban kem hi ïa kitei baroh kiba donkti pynïap briew.
“Hato phi sngew hun mo ïa kum kane ka jingleh shilliang jong ki bor ka aiñ, ban pynbna buskit ïa kiba ai jingtip ïa ki nongpynbthei bom. Katba ïa ki nongpynïap briew haduh mynta kim lah satia ban kem ne leh ei ei. Ka jingkylli ka long balei haduh mynta ym lah ban kem ïa kita ki nongpynïap briew kiba donkti pynïap ïa u samla ha ka jingjia kaba dang shu jia ha ka 3 tarik”, ong u Bah H.Lyngkhoi uwei na ki nongkren bad nongïalam sengbhalang hapoh ka thaiñ.