Wanrah u CEM KHADC ïa ka mangtyngka kaba tam ka jingpynlut ïa ka jingpynmih da 4.3 lak tyngka

Shillong, Lber 12 : U Chief Executive Member (CEM) ka KHADC ha kane ka sngi Nyngkong u la wanrah ïa ka mang tyngka na ka bynta ka snem treikam jong u snem 2024-25 kaba duna 4,33,410 tyngka kaba mut ba ka jinglut ka kham heh khyndiat ban ïa ka jingmih.
U CEM u la ong ruh ba ka jingmang ban pynlut ha kane ka snem ka kot sha ka 329,07,00,710 tyngka (329.07 klur tyngka) katba ka jingmang ka pisa kaban mih ka long 329,02,67,300 tyngka (329.02 klur tyngka).
U CEM u la ong, ba kane ka mang tyngka la pynlut na bynta ka tnad General Administration Department, ka Law Department, ka Revenue Budget bad Finance Department, ka tnad Forest, ka tnad Administration of Justice & Judicial, ka Tnad Legislative, ka tnad Pule puthi, Civil Work and Development, Enforcement Scheme for Protection of Tribal Land and Interest.
Ha kajuh ka por ka por u la ïathuh ba ki tnad kiba pynmih khajna ïa ka Council pat ki kynthup ïa ka tnad Land Revenue, Forest, ka tnad Administration of Justice, Market, Trade, Stationery and Printing, khajna na ki marpoh khyndew, khajna na ki kali, Professional Tax, Civil Works Department, kiwei kiwei ki jingpynlut (Miscellanous Receipt), Khajna na ki khyrdop, ka jingïarap na ka sorkar jylla bad ruh na ka Khasi Hills Building Structural Regulatory Authority.
U CEM u la ong ruh ba ha kane ka snem 2023-24 ka Executive Committee ka la lah ban wanrah bad mynjur ïa ka Administration of Elaka (Amendment) Bill, 2023 ban pynkup bor shuh shuh ïa ki dorbar shnong bad ruh ïa ki seng kynthei bad seng samla ha ki shnong. Nangta u ong ruh ba nalor ka United Khasi Jaintia Hills District Fishery (Amendment) Bill, 2023 ban ïada ïa ki dohum dohwah, ka Council kala wanrah ruh ïa ka Khasi Hills Autonomous District (Khasi Social Custom of Lineage) (Amendment) Bill, 2023 ban pynkup bor ïa ki Dorbar Kur.
Shuh shuh u CEM u la kdew ruh ba halor ka jingai jingbit ban shna iing, ka EC lyngba ka Khasi Building and Structure Regulatory Authority ka la pyrshang ban pynbha bad pynjanai ïa ka jingtreikam na bynta ban pynsuk ïa ki paidbah.
U CEM u la pyntip ruh ba halor ka jingai ïa ka syrnod trai jaka (Land Title Right Certificate) kaba dei ka dulir ban pynshisha ïa ka jinglong trai ha ka khyndew ka shyiap, ka Council ka dang kynduh jingeh namar ka jingdon ki notification na ka sorkar. “Halor kane ka Executive Committee ka la shimkhia bad ka jingïakren bad ka sorkar jylla ka dang ïaid shakhmat bad kyrmen skhem hadien ba ngi la lah ban weng jingeh ka jinglum na ka jingai Land Title Right certificate kan ïarap ban kyntiew shuh shuh ïa ka ïoh ka kot jong ka council.
U Bah Pynïaid ula pyntip ruh ba ka EC da ka jingïarap jong ka sorkar pdeng lyngba ka National Land Records Modernisation Programme kan sdang ban buh rekod ïa baroh ki khyndew ki shyiap hapoh u pud u sam jong ka council bad ngi kyrmen ruh ba lyngba kane ka skim kan ïarap bad pynsuk shibun ïa ki rukom buh jingthoh ba tikna ïa ki jaka puta.
Ha kajuh ka por u CEM u la ong ruh ba ha kane ka Dorbar Mangtyngka ym shym la lah bn pyni jinglut bad jingmih jong u snem 2023 – 2024 namar ba ym pat ïoh lum lut ïa ki jingkheiñ. Kumta u la ong ba ïa kane kin sa pyni ha ka Mangtyngka jong u snem 2025-26.