3 tylli ki projek buh mawnongrim u CM ki surok bad um sha New Shillong bad jingpynkhuid ïa ka Marten

Shillong, Lber 11:U Myntri Rangbah ka jylla u Conrad K Sangma ha ka sngi Nyngkong u la buh ïa ki 3 tylli ki mawnongrim na ka bynta ki projek jong ka New Shillong Water Supply Scheme, ka land reclamation project hapoh ka jaka jong ka Waster Processing and Disposal kaba ha Marten Mawlai bad ka jingshna ïa ki surok shnong kiba hapoh ka New Shillong Township kaba ha ka shnong Mawkhanu, Mawpdang.
Ha kane ka prokram u Symbud Myntri Rangbah ka jylla u Bah Sniawbhalang Dhar, u Myntri ka tnat PHE u Marcuise Marak bad ka Myntri ka tnat ka Koit ka Khiah ka Dr. Ampareen Lyngdoh bad u Chief Secretary u Bah D.P Wahlang ki la donlang kaba la pynlong hapoh ka shnong Mawkhanu, Mawpdang.
Haba kren ha ka jingïalang u Myntri Rangbah u Conrad K Sangma u la ong, “Ka long kaba ai jingkyrmen ban ïohi ïa ka jingïashim bynta jong ki nongshong shnong bad ka rukom pynïaid jong kane ka prokram kaban sah jingkynmaw. Kine ki 3 tylli ki projek kiba la sdang mynta ka sngi, ki wanrah ka jingïajan jong ka jylla sha ki mawjam jong ka jingïohi jngai ba kane ka sorkar ka don na ka bynta ka jylla”.
Haba ïathuh ba ïa ka New Shillong Water Supply Project, kaba la kot sha ka jinglut kaba T. 1600 klur ka long kawei na ki jingbei tyngka kaba heh jong ka jylla, na ka liang u Myntri Rangbah u la ong, “Kane ka New Shillong Water Supply Scheme ka la long kawei na ki projek kiba heh kiba la shim hapoh ka khana pateng jong ka jylla. ïa kane ka projek la mang kumba T.1,600 klur ha kaba na ka lajan T. 500 klur lah dep ban pyllait na ka bynta ka jingsdang kaba nyngkong ne ka first phase bad la buh ka thong ban pyndep hapoh ki 36 bnai”.
Kane ka New Shillong Water Supply Scheme kan ïarap ban pyndap umbam umdih na ka bynta ka Shillong bad ïa ka New Shillong Township ba kynthup ïa ki jaka pule bad ki ophis, bad ïa ki 32 tylli ki shnong kiba ha ka jingbun briew kaba mynta kaba long 29,889. Kane ka jingsdang ka long ban shakri ïa ka jingkiew ka jingbun ki nongshong shnong, kaba la buh ïa ka jingbun briew kaba 198,997 ngut la kumno kumno ha u snem 2042, bad ka jingbun briew ka ban sa kiew sha ka 413,701 ha u snem 2057.
Ha kaba ïadei bad ka jingtei ne jingshna ïa ki surok shnong hapoh ka Shillong Township, u Myntri Rangbah u la ong ba ïa ki surok ba la mut ban shna ïa ka shnong Mawkhanu kan long ha ka jinglut kaba T. 185 klur. U la ïathuh ruh halor kiwei pat ki surok kiba dang pyntrei kiba hapoh ka New Shillong Township ban ïarap ha kaba ïadei bad ki jingpynïasoh ïa ki surok bad kiwei ki lynti kiba la kot sha ka T. 343 klur kiba dang ïaid hapoh ka New township, kaba kynthup ïa ka shnong Ummir sha Mawkhanu bad Kynoton sha Lyngkien, Bellefonte sha new township, ka Diengpasoh sha Shillong bypass, bad Bribah Mawpat bad sha new township.
Ha ka phase kaba 2 jong ki surok, ki surok kiba hapoh ka 16.6 Km kaba da ka 15m ka jingïar bad ka 3.2 km jong ka 2-lane da ka jingïar kaba 7.5m la tyrwa ha ka jinglut kaba T. 185 klur. Kine ki surok la khmih lynti ba kin pyndep ha shwa ban kut jong u snem 2026.
Haba ïadei bad ka land reclamation project kaba don hapoh ka jaka jong ka Waste Processing and Disposal kaba ha Marten, Mawlai, u Myntri Rangbah u la ong, “Ka jaboh kaba la lum lang hapoh kane ka jaka ka la long ka jingsngewkhia ym tang ïa ki nongshong shnong ha kane ka thaiñ hynrei na ka bynta ki briew jong ka jylla baroh kawei. Ngin pynkylla ïa kane ka jaboh sha ka jingmih kiba lah ban pyndonkam biang bad shna biang”.
U la ong ba ïa ka project yn pyndep hapoh ka 12 sha ka 18 bnai. “ïa kane ka jaka bret bad theh ñuit yn pynkylla sha kaei kaei kaba ki paidbah kin lah ban pyndonkam bad ai jingïaroh bad ïa kane ka juh ka rukom yn sa leh kumjuh sha kiwei pat ki jaka sor jong ka jylla,” u la bynrap.
U la ong ruh kumjuh ba ka sorkar jylla ka la ruid dak ban pynïar ïa ki kam bad ki lad pynroi jong ka jylla bad ban wanrah ka jingkylla kaba bha na ka bynta ki nongshong shnong ka jylla. “Ka sorkar MDA ka dang ïaitrei da ka jingïohi kaba shai bad ka jingruid dak ban kyntiew ïa ka jylla sha kawei ka jylla hapoh ki 10, 25 bad kumjuh ruh wat sha ki 50 snem”, u la banjur.
“Ha kine ki 4 snem ban wan kan long ka jingkylla na ka bynta ka jylla bad ki nongshong shnong. Kane ka New Shillong township kaba kynthup ïa ka Knowledge City bad ka Administrative city lah dep ban buh hapoh ka mang tyngka kaba T. 10,000 klur na ka bynta ki kam pynroi, ka ban wanrah ïa ka jingpyndap kam ïa kumba 50,000 hajar tylli ki kam ba thylli,” la bynrap u Myntri Rangbah.
Haba ïathuh halor ka jingangnud jong ka Sorkar Pdeng ban thaw sa kumba 8 tylli ki sor ba thymmai ne ki new township lyngba ka ri, u Myntri Rangbah u la ong ba ka New Shillong Township ka Meghalaya hapoh ka jingpyrkhat jong ka sorkar Pdeng kan sa nangïoh ïa ki jingïarap pisa bynrap ba kot sha ka T. 500 klur.
U la ïathuh shuh shuh ba baroh ki kam jong ka sorkar la pynïasoh da ki jingthmu kiba don jingïohi jngai jong ka jylla ban kynjoh ïa ka thong jong ka ïoh ka kot kaba 10 billion US dollar bad ban kyntiew ïa ka jingïoh jingkot ki nongshong shnong.