Puk tur kynsan ki sengbhalang bad ki paidbah ka shnong Lapangap, Dawa hiar shuki ïa u CM bad ïa u Dy CM

Shillong, Jymmang 13: Namar ka jingbym lah shuh ban shu sngap ïa ka jingeh ba kila mad na ka jingshah thombor ha ki paid Karbi,Ki paidbah ka Shnong Lapangap, kaba don ha khappud ka West Jaintia Hills bad ka West Karbi Anglong, Assam, ha ka sngi Balang, kila wan tur paidbah sha Secretariat, Shillong.
Ki paidbah na Lapangap kila wan da ki bos na Lapangap bad kila ialum paidbah ha madan Malki ha ryngkat ka jingiadon lang ki katto katne ki kynhun Sengbhalang kynthup ka Khasi Students’ Union (KSU) bad Jaintia Students’ Movement (JSM) bad ka Jaintia National Council (JNC), ha shwa ban iatur paidbah sha Secretariat.
Kane ka jingtur sha Secretariat ka long ban pynbor ïa ka Sorkar Jylla ba kan ai ïa ki lad jingiada bad ka jingshngain ïa ki nongshong shnong jong ka thain, kham tam ki nongrep kiba la mad ïa ka jingshah pynjulor ki jingthung jingtep bad ki lyngka ha ki paid Karbi.
Ki Pulit ka East Khasi Hills kiba la pynkhlain bha ïa ka bor pahara bha ha IGP Point, kila khang lynti ïa ki paidbah ba kin tur sha Secretariat, haba kyntu ïa ki ba kin sangeh noh naba ka Sorkar kala khot ïa ki ban wan sha ka jingiakren.
Ki paidbah kim shym la sngap ïa kane ka jingkyntu bad kila pyrshang ban iatur beit shakhmat kaba la pynlong ïa ki Pulit ban hap pyndonkam da ki pepper spray bad ka jingbom lathi. La sakhi ruh ba ki paidbah kila pyndonkam ïa ki siej lama ban pynphai kylla sha ki Pulit.Ha kane ka jingiapyni bor, uwei u nongshongshnong ula shitom na ka jingshah synreit pepper spray.
Ha kane ka sngi ki paidbah kila pyrta jam ïa ka kyrteng u Myntri Rangbah ka jylla da kaba dawa hiar shuki bad kumjuh ruh ïa u Bah Sniawbhalang Dhar uba dei u Symbud Myntri Rangbah ka jylla namar ka jingbym lah ban ïada ïa ki paidbah kiba shong basah ha khappud.
U President ka KSU-West Jaintia Hills samla Laitphar Syngkrem ula pynrem jur ïa kane ka jingpyni bor ki Pulit bad ong “Ngi pynrem jur ïa ka jingleh ki bor District bad ki Pulit da kaba khang lynti ïa ki nongiakhih.Ka Dorbar Shnong Lapangap ka khlem wan hangne ban thaw ïa ki jingkulmar hynrei ban dawa ïa ka hok jong ngi, namar ka Sorkar kala leh kyllut bad leh matlah ïa ki jingeh ba ki iakynduh”.
“Lada ki kwah ban leit sha ki lyngkha kba, kila shah pyndik ha ki Pulit ka Assam, bad haba ki wan shane sha Shillong, kila shah pynibor ha ki Pulit ka Meghalaya. Lada ngim lah ban trei hala ka jong ka jaka bad lada ngim lah ban pynsngew ïa ka sur jong ngi hala ka jong ka jaka, shano pat phi khmih lynti ïa ngi ban leit” bynrap u samla Syngkrem.
Kane ka jingiakhih jong ki paid Lapangap la pynsangeh bad jai jai hadien ba ka Sorkar lyngba u Symbud Myntri Rangbah u Bah Sniawbhalang Dhar u la khot ïa kren noh ïa ki nongialam shnong bad ki dkhot sengbhalang.