Shillong, Jymmang 14: U myntri ka tnad pule puthi jong ka Sorkar Meghalaya, bah Lahkmen Rymbui ha ka 14 tarik Jymmang 2026, u la plie paidbah ïa ka SPS Tynrai Football Arena kaba la pynthymmai ha Shillong Public School, Laitumkhrah.
Na ka bynta ka Shillong Public School, ka jingplie ïa katei ka jaka ka long ka sienjam kaba kongsan ha ba ïadei bad ka jingïatreilang jong ka skul bad ka Tynrai Academy.
Haba ai jingkren ha ka jingïalang, u bah Lahkmen Rymbui u la pynshlur ïa ki samla pule ban beh ïa ki kam ïalehkai ha ryngkat ki jingpule. U la ong ba ka jingïalehkai ka don ka bynta kaba kongsan bha ha kaba pynwan dur ïa ka sap bad ka jinglong jong u samla pule. U la ai jingmut ïa ki samla pule ba kin buh beit ïa ka thong kum ka jingthmu ba kongsan tam bad ban pynkhreh ha ka rukom kaba biang ban pynurlong ïa ki.
U la bynrap ruh ba da ka jingdon ki lad jingïarap kiba thymmai ha ba ïadei bad kam ïalehkai, ki samla pule mynta ki ïoh ïa ka lad ban pynroi ïa ka bor met bad bor pyrkhat jong ki. Kaba kongsan, u la ong, ka long ba ki samla pule kin lap ïa ki sap jong ki bad ban trei shitom ban saiñdur ïa ka sap kaba ki don.
Haba kren halor ka jingdonkam jong ka sports, u myntri u la pynpaw ba ka kam ïalehkai kam dei tang ka jingsngewtynnad, da kaba pyntip ba ka Sorkar Meghalaya ka la pynthikna ba ki nongjop takma ha ki kyrdan ïakop national, international, Olympic, Asian Games, lane ka Commonwealth Games ki la thikna ba kin ïoh ïa ka kam sorkar.
U la pynpaw ruh ba ka sorkar India ka angnud ym tang ban pynlong ïa ka Commonwealth Games hynrei wat ïa ka Olympic Games ha ki por ban wan. Haba phai sha ka Manipur kaba marjan, u la ong ba lada ka Manipur ka lah ban pynmih bun ki nongïalehkai Olympic, ka Meghalaya ruh ka lah ban leh kumjuh. Haba kdew ïa ka Matsiewdor War, kaba la mihkhmat ïa ka ri sha ka Asian Games, u la pynshlur ïa ki samla pule ba kin don ka jingngeit ha lade, ban lap ïa ki sap ba ki don, bad ban trei shitom ban pynurlong ïa ka thong.
Hadien ka jingïalang, la pynlong ïa ka jingïalehkai phutbol paralok hapdeng ki ophisar jong ka Directorate of School Education & Literacy bad ki khynnah skul jong ka Shillong Public School.
