Shah kem 2 ngut ba suba donkti pynbthei bom IED ha Them ïew Mawlong

Shiillong, Lber 11: Ki Pulit ka jylla ki la kem arngut ki briew kiba la suba ba ki donkti ha kaba jingpynbthei bomb IED ha Them Mawlong, ha haka ba ju ïeng ki bus kamai kaba la jia ha ka miet 9 tarik mynta u bnai.
Katkum ka kyrwoh ba la phah da u SP East Khasi Hills District, u Rituraj Ravi, la ïathuh ba kiba la shah kem ki long u Ebakordor Nongpluh, 26 snem ka rta na West Jaiñtia Hills, uba la shah kem na Shillong. Uwei pat udei u Bah Tarson Lymba 58 snem ka rta uba la shah kem na Dawki.
Ïa kine baroh arngut la leit rah hakhmat ka ïingbishar mynta ka sngi bad ki Pulit ki la ïoh bor ban tohkit ïaki shiphew sngi lynga ka Police Custody.
Ki Pulit ki la kam ba ki don ki sakhi kiba biang ba kine arngut kidei kiba ïadon bynta ha kane ka jingpynbthei bom IED ha ka Them ïew Mawlong ha ka 9 tarik mynta u bnai.
Hadien kane ka jingshah kem jong u Bah Tarson, ki nongïalam ka HNYF hapoh ka jingïalam jong u Bah Sadon Blah, Presaident ka Seng ki la leit ban ïakynduh ïa ki Pulit, namar ba u Bah Tarson udei u Disciplinary Secretary ka HNLC.
Haba ïakren bad ki lad pathai khubor, u Bah Sadon, u la ong ba ka Seng kam kwah ban ong than ha kaba ïadei bad ka jingshah kem u Tarson bad halor ka jingtohkit ki Pulit ba u don bynta ha kaba pynbthei bom IED ha Them ïew Mawlong, hynrei u la ïathuh ba u Bah Tarson udei uba ïadon bynta bad ka jingïakren hapdeng ka HNLC bad ka sorkar, namar dei ma u uba ju leit shaw ïa ki nongïalam ka HNLC haba ki wan kiew na Bangladesh sha Meghalaya ban ïashim bynta ha ka jingïakren ïasuk, namar u ithuh lynti ban ïalam ïa ki sha jaka ba ki sah.
Ha kajuh ka por u la ong ba kane ka jingkem jong ki Pulit ïa u Bah Tarson ka lah ban dei ba ki shu pharep, namar ba ki nongïalam jong ka Seng naduh ba pynbna ka HNLC ban weng noh na ka jingïakren ïasuk, ki la shah pyndik ha ki Pulit bad wat ma u ruh u la shah pyndik arsien laisien, ha kaba ki la khot hajir ne shah talasi haba leit jingleit da ki kali.
Lah ban kdew hangne ba ka jingpynthei bom IED ka la jia ha ka miet Sngi Saitjaiñ ha jaka ieng Bus jong ka Shillong Syndicate, ha Them ïew Mawlong kaba don ha syndah jong ka Them Metor. Ha kane ka jingbthei bom, kawei ka dukan ka la pra bad pait lut ki ïit bad uwei u briew u la mynsaw.