Shillong, Risaw 12: Ki thei ka Meghalaya ki la mad namrem sa ha ka Manipur da hynñiew wicket ha ka lympung lehkai jong ka Women’s U-19 One Day Trophy ha Surat hynne ka Sngi Palei katba ka kynhun lehkai U-19 ki shynrang ka la shah rem da 346 ron ha ka Bengal ha ka sngi sdang jong ki ha ka Vinoo Mankad Trophy ha Vijayawada.
Ka Meghalaya ka la shah pynhap baroh ki wicket tang hadien ba kynjoh sha ka 97 ron na ki 36.4 over, ka Janicka R Marak ka la ïarap 46 ron naki 78 bol. ka Kambesa A Sangma ruh ka la lah ban kyntiew da 21 ron naki 48 bol wat hadien ba mih nombar ba 8.
Na ka liang jong ka Meghalaya ka pyrshang da kaba pyndonkam baroh 9 ngut ki bowler ban khanglad ïa ka Manipur hynrei ka la pyndep ban kynjoh sha ka 98/3 hapoh ka 27.2 over. Ka Meghalaya ka la ïoh khur ar wicket lyngba ka run out na ka Fennysha Nongrum bad ka Jayshree Singh bad kawei kaba la shah pynhap ha ka Natasha Rabha (1/17). Ka Meghalaya kan sa ïakhun biang la sngi Saitjaiñ pyrshah ïa ka Tamil Nadu.
Ha kajuh ka por, ki rang U-19 ka Meghalaya ki la ïakynduh mawsiang hadien ba ka Bengal ka la buh thong haduh 402/3 naki 50 over, katba ka Meghalaya ka la shah pynhap baroh bad tang 56 ron naki 35.2 over bad shah jop haduh 346 ron Watla kata ruh, lai ngut ki nongkawangbol ka Meghalaya kiba la khur wicket- Kshtij Singhania (1/36), Angkit Tamang (1/52) bad u Da-u-la-biang Shangpliang (1/59) – u Shubham Rasaily u la ïoh ban kamai 19 ron.
La sngi Saitjaiñ ka Meghalaya kan aireng sa ïa ka Uttarakhand.
