Shillong, Lber 19 : Ka Nangkiew Irat SC ka la khur suk ïa ki lai point ha ka Shillong Premier League da kaba pynliem noh da 2-1 kol ïa ka Sawmer SC ha ka jingïakhun kaba itynnad bha ha kane ka janmiet sngi Ba-ar ha madan SSA Stadium, Polo.
Ïa kitei baroh ar tylli ki kol la ïoh ban thep da u Shaibor Nongrum tang hapoh shiteng kynta jong ka kylla miet, kata ha ka minit kaba 62 bad minit ba 83.
Katba ïa ka shi kol jong ka Sawmer pat la ïoh ban thep da u Diego Khriam ha ka minit kaba 70.
La sakhi ba ka jingïakhun ha ka kylla step ka long kaba itynnad bha khamtam haba ym shym la don satia mano mano ban ïoh ban thep kol. Ka jingïalehkai ka la nang itynnad shuh shuh ruh hadien ba ka Nangkiew Irat ka la ïoh ban lamkhmat ha ka minit kaba 62 hynrei tang hadien phra minit ei ei ka Sawmer ka la ïoh ban pynphai noh.
Ha kajuh ka por, ka Nangkiew Irat ka la duh ei bun ki kabu ksiar khamtam ha ka minit kaba 23 lyngba u Banshanlang Nongdhar bud pat sa u Nikhil Raj hadien ar minit tang na ka daw ka jingtbit palat u rangap kol ka Sawmer, u Pyrshangbanbha Dkhar.
Watla u Nikhil u la ïoh biang ïa ka kabu ban thep kol hynrei um shym la lah satia naba ka bol kaba u khyrwit ka leit dei noh ïa u dieng kol ha ka minit kaba 34.
Haba phai pat sha ka Sawmer, u Gamelial Kharlyngdoh u la ïoh katto katne ki lad ha ka kylla step. Shwa ban kut ka kylla step ruh u la ïoh biang ïa ka kabu ksiar ban lamkhmat ïa ka kynhun hynrei ka bol kaba u khyrwit ban poi sha kol ka leit pynban sha rud.
Ka kylla miet ka la nangitynnad naba baroh arliang ki ïakhun ban ïoh lamkhmat bad dei ha ka minit kaba 62 ba u Shaibor u la ïoh ban rah para marwei ïa ka bol bad khlem bakla u la ïoh ban thep suk da kaba pynkiar ïa u rangap kol.
Kaba kham pynshongshit ha kane ka sngi ka dei da ka jingïoh pynïakhaid noh jong u Diego tang hapoh 10 minit ha kaba ka bol kaba u khyrwit ka la pynlong ïa u rangap kol ka Nangkiew ban ym lah leh ei ei shuh.
Pynban ha ka por ba baroh ki rangïalehkai ki la kheiñsting ba kin ïoh ban ïasam mar shi point, u Shaibor u la ïoh biang ïa ka lad ban pynkhih biang sa shisien ïa ka jar jong ka Sawmer kaba pyntikna syndon ïa ka kynhun ban khur suk ïa ki lai point.
Ka jingïakhun kaba bud jong ka SPL kan long ha kane ka sngi Thohdieng ha kaba ka Shillong Lajong kan ïakhun pyrshah ïa ka Langsning ha ka por 3:00 baje janmiet.
