Shillong, Lber 19 : Ka National Cricket Academy jong ka BCCI ka la jied saw ngut ki thei ïalehkai kriket ba kynsai na Meghalaya ban leit shim bynta ha ka North East Senior Women’s camp kaban long naduh ka 22tarik u Ïaiong haduh ka 16tarik Jymmang ha Rangpo, Sikkim.
Kine ki sawngut ki kynthup ïa ka Monika Lyngdoh Phawa, Debasmita Dutta, ka Ajima Sangma bad ka Luiza Tamang.
Kine ki thei ïalehkai kin ïoh ban don lang bad ki nongïalehkai kriket na ki san tylli kiwei pat ki jylla ha ka North East Zone, kata ba kynthup ïa ka Sikkim, Manipur, Mizoram, Nagaland bad Arunachal Pradesh ha katei ka camp.
Ïa kine ki nongïalehkai la jied katkum ka jingtbit jong ki ha ki lympung ïalehkai jong ka BCCI ha u snem 2023-24 kynthup naduh ka Senior Women’s T20 Trophy ha u Risaw jong u snem ba la dep bad ruh ka Senior Women’s One Day Trophy kaba dang shu lah shen ha u Kyllalyngkot mynta u snem, 2024.
