Lyngba ka spah ron u Arpit khur jingjop ka Nongmensong

Shillong, Lber 15: Ka kynhun ïalehkai kriket jong ka Nongmensong CC ka la lah ban pynliem ïa ka Sunrise CC da 7 wicket ha ka jingïalehkai kaba la long hynne ka sngi ha ka lympung Shillong Cricket League Super Division 2024. Ha kane ka jingïalehkai u Arpit jong ka Nongmensong CC u la lah ban tyngshaiñ bha ïalade hadien ba u la khyrwit palat ïa ka spah ron ban ïarap ïa ka kynhun ban jop suk da 7 wicket.
Haba phai sha kane ka jingïalehkai, ka Sunrise CC ka jied ban tied nyngkong hadien ba jop ïa ka toss. Haba shimti ïa ka pali tied nyngkong kane ka kynhun ka la kynjoh 181 ron shuwa ba baroh 10 ngut kin shah pynkhyllem noh hadien 39.2 over.
Ki rangtied kiba la ïoh kamai bun ron ïa ka kynhun ki long u Manish Sangam (51 ron naki 66 bol) bad u Krishna Chettri (30 ron naki 29 bol).
Haba phai sha ki rangkawangbol ka Nongmensong CC kiba seisoh ki kynthup ïa u Raghav Magotra u ba la kawang 7 over, shah tied 17 ron bad khur 3 wicket, katba u Anish Charak u la pyndep 9 over, shah tied 27 ron bad khur 3 wicket.
Haba pyrshang ban beh ïa katei ka thong ba la buh, ka Nongmensong ka la lah ban pyndep tang hadien 26.4 over bad shah pynhap tang 3 ngut ban kynjoh pura sha ka 183 ron bad jop ïa ka jingïalehkai da 7 wicket.
U Pawan Kumar Singh (6 over: shah tied 18 ron: khur 1 wicket) bad u Prince Thakur (4.4 over: shah tied 23 ron: khur 1wicket) rangkawangbol ka Sunrise CC ki la ïoh ban pynhap mar u wei hynrei kane kam pat biang ban pyllait ïa ka kynhun na ka namrem.
Haba phai sha ki rangtied ka kynhun ba khur jingjop, u Manish Rai u la tied 30 ron naki 38 bol, bad ka namtam ka long sha u Arpit u ba la khyrwit haduh 123 ron naki 99 bol bad ban khur syndon ïa ka khusnam Player of the match.