Shillong, Lber 15: Ka kynhun ki nongïalehkai ka jylla hapoh ka lama jong ka Meghalaya State Olympic Association mynta ka sngi kin mih na nongbah Shillong ban leit ïakhun sha ka lympung ïakop kaba la tip da ka 3rd North East Games ka ban long ha Nagaland naduh 18 tarik haduh 23 tarik mynta u Lber 2024.
Ha kane ka kynti ka Meghalaya State Olympic Association (MSOA) ka la sei haduh 249 ngut ki nongïalehkai (athlete) kynthup bad ki nongïalam ban ïashimbynta ha ki 14 tylli ki jait jingïalehkai (discipline) ha katei ka North East Games kaba lai ha Nagaland.
Na ki 15 tylli ki jingïalehkai ba ka Nagaland kan pynlong ka Meghalaya kan nym shimbynta tang ïa ka sepak takraw (kick volleyball).
Shuwa ba kitei ki nongïalehkai ryngkat bad ki nongïalam kin mih na jylla ban leit sha Nagaland, na ka liang jong ka MSOA ha ryngkat bad ka tnat ïalehkai jong ka Sorkar jylla ka la pynlong ïa ka prokram kitbok kitrwiang khadduh ban ai mynsiem ïa ki samla ka jylla ba la pynlong ha madan First Ground, Polo, hynne ka sngi.
Ha kane ka sngi la ïadonryngkatlang ka Kong Isawanda Laloo-Director of Sports & Youth Affair kum ka Kongsan, u Working President ka MSOA -Bah John F Kharshiïing, u General Sec. ka MSOA- Bah Finely Pariat, ki coach bad ki manager lem bad ki khynnah ïalehkai ki ban mihkhmat ïa ka jylla sha katei ka North East Games, lem bad kiwei kiwei kiba la shah khot sngewbha.
Na ka liang jong ka Kongsan ka la kyntu ïa ki nongïalehkai ba kin trei shitom bad lehkai khambha shuh shuh ban kyntiew lai shah ïa ka jingkhur takma na kane ka lympung ba ladep snem 2022 kaba la long ha jylla.
Ka Kong Isawanda ka la pynpaw ruh ba man ki nongïalehkai ki ban ïashimbynta ha ki kyrdan bapher bapher ki la pynkhreh bha ïalade shuwa ba kin leit ïakhun sha kane ka lympung bad ngeit skhem ba kin wanrah nam ïa ka jylla da kaba khur shibun ki takma.
Kumban shu pynkynmaw, palat 3,000 ngut ki nongïalehkai (athlete) kiba la wan ïashimbynta ha ka North East Olympic Games 2022 ha Meghalaya, bad 18 tylli ki jait jingïalehkai (discipline). Ka Manipur ka la long ka lahduh da kaba khur haduh 237 tylli ki takma, bad 85 tylli ki dei ki takma ksiar. Katba ka jylla ka la wan kyrdan ba saw bad ïoh khur 149 tylli ki takma ba kynthup 36 ki ksiar, 35 rupa bad 78 tylli ki rnong.
Hynrei ha kane ka kynti, ka North East Games ka kynthup tang 15 tylli ki jait jingïalehkai (Discipline) bad kine ki long Archery, Athletics, Badminton, Basketball, Boxing, Football, Lawn Tennis, Pencak Silat, Sepak Takraw, Table Tennis, Taekwondo, Volleyball, Belt Wrestling, Wrestling bad ka Wushu.
Ka jylla kan ïashimbynta 14 tylli ki rynsan ïakop lait noh ka sepak takraw (kick volleyball) ha kane ka 3rd North East Games ha Nagaland.
