Hato ka tnad ïalehkai sport ka shim khia ban leit jngoh bad jied ïa ki rang bad thei ïalehkai na ki skul ?

Man la u snem kata ha u Bnai Lber haduh Iaiong la ju ïohi ba ki skul naduh sor haduh nongkyndong ki ju bunkam ban pynlong ïa ki tamasa ïalehkai ba harukom. Hynrei ka jingkylli kaba mih ka long ba watla ki dei ki lympung ki long man u snem hynrei katno ngut eh ki samla ïalehkai ba pawnam ba ka jylla ka ïoh ban sei.
Kawei pat ka jingkylli ka long ba la ka tnad ïalehkai jong ka sorkar Jylla ka la ju snohkti lang bad kitei ki rynsan ïalehkai jong ki skul. Lada ka jubab kadei haoid, kiei ki jingkyrshan kiba ka ai sha kitei ki skul bad katno ngut ki rang bad ki thei kynsai kiba tbit ba ka la dep ban jied.
Ym lah ban len, lada ka tnad ïalehkai jong ka sorkar hi ka shimkhia, da kaba phah ïa ki coach kiban leit shim bynta lang ha kitei ki tamasa ïalehkai jong ki skul, lehse bun ki skul kin ïoh ban sei ki nongïalehkai kiba tbit kiba lah pat ban mihkhmat ïa ka jylla ha ki lympung ïalehkai bapher bapher. Hynrei sngewsih imat katei kam don satia haka jingmut jingpyrkhat jong ka tnad.
Lah ruh ban ong ba ka jingpynlong ïa kitei ki tamasa ïalehkai man ka snem ki shu kut beit tang ha kito ki skul hi namar ym don ki briew naka tnad kiba leit ban peit lane ban jied bad buh kyrteng ïa ki nongïalehkai kiba tbit. Kumta kane ka ïai bteng na uwei u snem sha uwei pat bad kumta kito kiba tbit ki shu kut beit tang ha ka jingdeng medal rong stem ryngkat ka syrnod khlem da poi pat shaei shaei.
Ka la dei ka por ba ka tnad ïalehkai jong ka sorkar jylla ba kan kyndit bynriew noh naduh mynta khnang ba ka jylla kaba dang sahdien bha ha kane ka phang kan ïoh ban pynkhreh khambha na ka bynta ki lympung ïalehkai kiba harukom la ka long ha ka thaiñ shatei lam mihngi jong ka Ri kumba ju tip kum ka North East Games lane ki National Games.
Ka por ka dang biang ïa ka tnad ba kan kyndit thiah. Kam dei satia ka kam kaba eh ïa ka, lada ki district sports officer ki lah ban trei ïa ka kam da ka jingkitkhlieh ka jylla hi ka lah bansei bun ki rang bad ki thei ïalehkai ba kynsai.
Kawei ruh kam don jingeh ei ei ïa ki ophisar ka tnad ban leit kum ki nongpeit kai ha ka sngi ba kitei ki lympung ïalehkai ki don. Dei lyngba kitei ki rynsan ïalehkai ba ki lah ban jied kino kiba khlaiñ ha ka ïakob mareh 100, 200 ne ki jingïakob mareh jngai. Ki lah ruh ban jied ïa kito kiba khlaiñ ha ka long jump, high jump ne ha kiwei pat ki jingïalehkai. Lada ki lah ban jied tang kumba lai ngut na man kawei pa kawei ka jait jingïalehkai na kawei kawei ka skul, lehse ka tnad kan ïoh pahuh bha ki nongïalehkai bad da kaba leh kumtei, kan lum lang pat ïa baroh kitei ki khynnah skul ban pynïakob pat hapdeng para ma ki khnang ba kan ïoh sa tang ïa kiba kynsai tam.
Kawei pat ka bynta ba ka sorkar lyngba ka tnad kadei ban leh, ka long ban kyrshan pisa ne ai ïa kita ki scholarship ïa kito kiba ka jied ban shah pyntbit kyrpang kumba long lem ha kiwei ki jylla kumba lamkhmat da ka Manipur. Lada ka lah ban leh kumta, lehse tang hapoh san snem ka Meghalaya kan kylla long kawei na ki jylla kaba lah ban pynmih bun bha ki nongïalehkai kiba kynsai ha ka Ri.
Kumba long haduh mynta, jan ha baroh ki jait jingïalehkai ha ka Ri, ki samla Manipur kidei ban don beit namar kitei ki la ïoh ïa ka tynrai naduh na la iing bad kumta kam shem jingeh shuh ïa ki ban ïakhun ha kino kino ki lympung. Ym tang katta dei kitei ki samla kiba wan na ka thaiñ shatei lam mihngi jong ka Ri kiba paw khmat eh ha man la ki lympung ïalehkai ba ka Ri ka pynlong.
Ka por ka dang biang palat bad lada ka kyndit thiah noh mynta,lada ka sorkar ka kwah ban shim khia ban kyntiew ïa ka kam ïalehkai sport ka la dei ruh ban seng da kawei ka skul kaba kyrpang ban ai jinghikai ïa ki samla lehse kiba ka la jied kyrpang na ki skul badpher bapher ba kin don noh ha katei ka skul ban ai jinghikai ïa ki naduh ka jingpule haduh ki kam ïalehkai sport bad lada ka sorkar ka leh kumne khlem artatien ka lah ban sei bun ki samla kiba la tbit bad kiba la paw ha kiba bun ki liang.