Shillong, Nailur 22 : Ka Meghalaya Carrom Association (MCA) ka la pynlong ïa ka 24th Meghalaya Open State Ranking Carrom Championship 2026–2027 ha Jaïaw Laitdom Dorbar Hall, Lumbatemon, kaba la pynïaid da ka Jaïaw Laitdom Dorbar Carrom Club.
Ha kane ka prokram, u Working President jong ka Khun Hynniewtrep National Awakening Movement, u Thomas Passah, u la long u Kongsan, katba u Rangbah Shnong ka Jaïaw Laitdom Dorbar, u Bah SB Kharbangar, u la donlang kum u Symbud Kongsan.
Ha kane ka jingïalehkai la wanshim bynta ruh ki Founder Member jong ka Jaïaw Laitdom Dorbar Carrom Club ba kynthup ïa u Bah William Marbaniang bad u Bah Myguardy Thabah, u Chief Umpire Bah Ardon K. Majaw bad u Bah Mebankitkupar Marwein, uba long u 50th Junior National Carrom Champion 2025–2026.
Haba kren ha ka jingïalang, u Secretary ka MCA, u Bah Ferdinand Nongkynrih, u la ong ba ka association ka pynlong ïa kane ka championship ban jied ïa ki nongïalehkai kiba lah ban mihkhmat ïa ka Meghalaya ha ki jingïalehkai ha ka kyrdan jylla bad ri ha ki kyrdan Junior, Senior bad Veteran. Ha kane ka snem, kumba 130 ngut ki nongïalehkai ki la ïashim bynta ha ka Senior category, kiba wan na Jaintia Hills, South West Khasi Hills, Ri-Bhoi bad Garo Hills.
U la ong ruh ba don ki nongïalehkai kiba ym pat sngewskhem halade ban ïashim bynta ha ka ki jingïalehkai singles, kumta ki la jied shwa ïa ki ban ïalehkai doubles ban ïoh ïa ka jingsngew skhem bad pynkhlaiñ ïa ka mynsiem ïakhun.
Ki nongjop ha kine ki jingïakhun ki long – Ha ka Junior Girls: Mayaphica Elisa Kharkongor – Champion; Silvarinia Kharmawphlang – Runner-up.
Junior Boys: Mebankitkupar Marwein – Champion; Nicholas Kharjana – Runner-up.
Mixed Doubles: Mathaious Pde bad Drossilin Kshiar – Champions; Justin Kharkongor bad Bada Dohling – Runner-up.
Men’s Doubles: Arbines Lyngdoh bad Bunlang War – Champions; Badon Barim bad Living Kharkongor – Runner-up.
Women’s Singles: Sukmon Mukhim – Champion; Badaiahun Dohling – Runner-up.
Men’s Veteran: Arbines Lyngdoh – Champion; J.B. Sunar – Runner-up.
Men’s Singles: Rajdeeo Sarkar – Champion; Justin Kharkongor – Runner-up.
Team Event: Ryntihlang Carrom Club – Champion; Jaïaw Laitdom Dorbar Carrom Club – Runner-up.
Ïa ki nongjop la sam da ki khusnam, certificate bad khusnam pisa katkum ki thup ïakhun jong ki. Ha ka jingïalang la donlang ruh u President ka MCA, u Bah S. Lyngdoh, ka Treasurer Anita Kharkongor bad u Adviser Bunlang War, ryngkat bad ki dkhot jong ka Jaïaw Laitdom Dorbar Carrom Club.
