Shillong, Lber 15: Ka kynhun ïalehkai Shillong Lajong FC kan sa ïakhun biang ïa ka lympung I-League mynta ka sngi ka ban long shabar nala ïing pyrshah ïa ka Namdhari FC ha ka por 3:30 baje nohphaisngi ha Bhaini Sahib Stadium, Ludhiana.
Ka Lajong kan jam sha kane ka jingïakhun hadien ba ïakhaid mar kawei bad ka Real Kashmir FC dang shen hala ïing. Ka kynhun ka don mynta ha ka thup kyrdan ba 6 ha ka miej ryngkat ki 30 point ba ka la khur na ki 19 sien ïakhun ba kynthup 8 sien namjop, 6 sien ïakhaid, bad rem san sien.
Katba ka Namdhari ka shong ha ka kyrdan ba 11 ryngkat ki 19 point ba la khur na ki 20 sien ïakhun (5 jop: 4 ïakhaid: 11 rem).
Kumba ka paw ka Lajong ka don jingkyrmen ban khur pura ïa ki lai point na kane ka jingïakhun, hynrei kan nym long kaba suk ïa ka kynhun namar kan hap ban ïalehkai shabar nala ïing ha kaba baroh ar kin ïaknieh ban khur shalade ïa ki lai point ban kyntiew kyrdan ïalade ha ka miej kheiñ point ka lympung I-League mynta ka samoi.
